මේ දිනවල කොළඹ, ගම්පහ, මහනුවර, නුවර එළිය පෙදෙස්හි මග දෙපස රෝස පැහැ මල් පිපුණු ගස් බොහෝය.

මේ මල් තබෙබුයා රෝසියා යන උද්භිද විද්‍යාත්මක නාමයෙන් හැඳින්වෙන බව පේරාදෙණිය ජාතික උද්බිද උද්‍යානයේ අධ්‍යක්ෂ ආචාර්ය සිරිල් විජේසුන්දර මහතා කියයි.

වෙනිසියුලාව, ඉක්වදෝරය හා මෙක්සිකෝව නිජබිම කරගත් මෙම මල් හටගන්නා ගස් බ්‍රිතාන්‍ය යුගයේ ශ්‍රී ලංකාට හඳුන්වා දෙන්නට ඇතැයි ද ඔහු කියයි.

මෙම මල්වලට සිංහල නමක් නැති නමුත් ශ්‍රී ලංකා සකුරා යැයි ඇතමෙක් කියති.  මැයි මල් යැයි තවත් අය කියති.

නියං කාලයේ දී දැකිය හැකි මේ මල් ගස් මුදුන් පමණක් නොව ගසේ මුල ද ලස්සන කරයි.