(රන්ජන් කටුගම්පල  සහ  නිමන්ති රණසිංහ)
 
 ව්‍යාජ ලේඛන සකස් කර රුපියල් ලක්ෂ 21කට ආසන්න මුදලක් වංචා කරන ලදැයි ගණකාධිකාරිවරයකුට එරෙහිව පවරා තිබූ නඩුව විභාගයට ගැනීමෙන් පසු අදාළ චෝදනාවන්ට ඔහුව වරදකරු කළ කොළඹ මහාධිකරණ විනිසුරු ශිෂී මහේන්ද්‍රන් මහතා, විත්තිකාර ගණකාධිකාරිවරයාට රුපියල් ලක්ෂ 19ක දඩ මුදලක් සහ වසර 367ක බරපතල වැඩ සහිත සිරදඩුවමක් අද (06)  නියම කළේය.
 
 මෙම විත්තිකරු අධිකරණය මග හැර සිටීම හේතුවෙන් විත්තිකරුට විවෘත වරෙන්තු නිකුත් කළ මහාධිකරණය විත්තිකරුගේ විදෙස් ගමන් තහනම් කිරීමේ නියෝගයක් ද නිකුත් කළේය. එසේම, එම විදෙස් ගමන් තහනම් කිරීමේ නියෝගය ආගමන විගමන පාලකවරයා වෙත සහ බුද්ධි අංශයන් වෙත වහාම දන්වා යවන ලෙසට ද අධිකරණ ප‍්‍රධාන රෙජිස්ට‍්‍රාර්වරයාට නියෝගයක් නිකුත් විණී.
 
 මෙවැනි වරදිකරන අනෙක් විත්කිකරුවන්ට මෙන්ම අනෙක් පුද්ගලයින්ට නැවත මෙවැනි වැරැද්දක් නොකිරීමට ආදර්ශයක් ලෙස මෙලෙස දඩුවම් නියම කරනු ලබන බව සදහන් කළ මහාධිකරණ විනිසුරුවරයා මෙම තීන්දුව ප‍්‍රකාශයට පත් කළේය.
 
 මෙලෙස දඩ, සිරදඩුවම් සහ විවෘත වරෙන්තු නිකුත් වූයේ පුද්ගලික ආයතනයක ගණකාධිකාරීවරයකු වූ හික්කඩුව ලියනගේ නන්දසිරි නැමැත්තාටය.
 
 
විත්තිකාර ගණකාධිකාරිවරයාට එරෙහි චෝදනා 19ක් ඉදිරිපත් කර තිබූ අතර, පළමු චෝදනාවට වසර 7ක බරපතල සිරදඩුවමක් නියම කළ අතර ඉතිරි චෝදනාවන්ට වසර 20 බැගින් බරපතල වැඩ සහිත සිරදඩුවමක් නියම කළේය. ඒ අනුව, අදාළ චෝදනාවන්හි දඩුවම් එකට කි‍්‍රයාත්මක වී වසර 367ක සිරදඩුවමක් බවට පත්විණී.
 
 වර්ෂ 2000 සිට 2001 අතර කාලය තුළදී කී‍්‍රඩා උපකරණ අලෙවි මධ්‍යස්ථානයක සේවකය කරමින් සිටියදී රුපියල් 21,99130.66ක මුදලක් ව්‍යාජ ලේඛණ සකස් කර වංචා කරන ලදැයි නිතිපතිවරයා මෙම විත්තිකරුට එරෙහිව කොළඹ මහාධිකරණය හමුවේ අධි චෝදනා ගොනු කර තිබිණී.