ලයන් බෲවරි සිලෝන් ලිමිටඞ් සමාගම ඇතුළු තවත් සමාගම් හතරකට රුපියල් කෝටි 600කට ආසන්න රේගු බදු සහන ලබාදීම සම්බන්ධයෙන් කරුණු දැක්වීම සඳහා ලබන නොවැම්බර්  7  වැනිදා අධිකරණය හමුවේ පෙනී සිටින ලෙස  මුදල් ඇමති රවි කරුණානායක ,රේගු අධ්‍යක්ෂක ජනරාල්වරයාට හා මුදල් අමාත්‍යාංශ ලේකම්වරයා ඇතුළු 14 දෙනෙකුට නියම කරමින් අභියාචානාධිකරණය අද (12) දෙවැනි වරටද  නොතීසි නිකුත් කළේය.

මේ සම්බන්ධයෙන් කරුණු දැක්වීම සඳහා අද (12) අධිකරණයේ පෙනී සිටින ලෙස එම වගඋත්තරකරුවන්ට නියම කරමින් මීට පෙර නොතීසි නිකුත් කර තිබූ නමුත් එම නොතීසි නිසි පරිදි ලැබී නැති බවට අවධානය යොමු කළ අභියාචානාධිකරණය මෙලෙස යළි නොතීසි නිකුත් කරනු ලැබීය.

මාස හතරක කාලයක් සඳහා රේගු බදු සහන ලයන් බෲවරි සමාගම ඇතුළු තවත් සමාගම් 4කට ලබාදීමට ගෙන ඇති තීරණය අහෝසි කර එම රුපියල් කෝටි 600කට ආසන්න මුදල මහජන සුබ සිද්ධිය සඳහා යොදවන ලෙස ඉල්ලා ගොනු කළ රිට් පෙත්සමක් සලකා බලමින් අභියාචනාධිකරණය විසින් මෙලෙස නොතීසි නිකුත් කරන ලදී.

අභියාචනාධිකරණ සභාපති විනිසුරු විජිත් මළල්ගොඩ සහ අභියාචනාධිකරණ විනිසුරු එස්.තුරෙයිරාජා  මහතා ඉදිරියෙහි පෙත්සම කැඳවිණි.