වගකීමේ සහතිකයේ වලංගු කාලය තුළදීත් තම වාහනය තමන් කැමැති තැනකින් සේවා කටයුතු හෝ අලුත්වැඩියා කටයුතු කිරීමේ අයිතිය වාහන හිමියන්ට ලබාදීමට රජය තීරණය කිරීමත් සමගම ගනුදෙනුකරුවන් අකාර්ෂණය කරගැනීම සඳහා සිය නඩත්තු ගාස්තු පහළදැමීමට වාහන අලෙවි සමාගම් තීරණය කර ඇත.

සලේ අල් හමාඞ් අල් මානා සමාගම සිය සියලුම නිසාන් වාහන අලුත්වැඩියා කිරීමේ ගාස්තු සියයට 23ත් 48ත් අතර ප්‍රමාණයකින් පහළ දමා ඇති බව ආර්ථික සහ වාණිජ අමාත්‍යාංශය පවසයි. අනෙක් වාහන වෙළෙඳ සමාගම්ද ඉදිරියේ දී සිය ගාස්තු අඩු කිරීමට නියමිතය.

ඉහත සමාගම සිය නව ගාස්තු ලැයිස්තුවට අමාත්‍යාංශයේ අනුමැතිය ලබාගැනීම සඳහා අදාළ බලධාරීන් වෙත ඉදිරිපත් කර ඇති අතර නව ගාස්තු අප්‍රේල් 10 වැනිදා සිට ක්‍රියාත්මක වන බව අමාත්‍යාංශය පවසයි. එම මිල ලැයිස්තුවට අමාත්‍යාංශයේ අනුමැතිය ලැබී ඇත.

අමාත්‍යාංශය පසුගියදා නිකුත් කළ වගන්ති 9ට අනුව වගකීමේ සහතිකයට කිසිදු බලපෑමක් නොමැතිව තම අභිමතය පරිදි සහතිකලත් ගරාජයක් ලවා තම වාහනය අලුත්වැඩියා කරගැනීමේ අයිතිය අදාළ වාහනයේ හිමිකරුවාට ලැබෙයි. මෙම නව නීතිය ප්‍රදර්ශනාගාරවල තිබෙන අලුත් වාහනවලට පමණක් නොව පැරැණි එහෙත් වගකීමේ සහතිකයේ කල් ඉකුත් නොවූ වාහනවලටද අදාළ වෙයි.

“මෙම පියවර ගැනීමේ ප්‍රධානම අරමුණ තමයි වගකීමේ සහතිකයේ සඳහන් කාලය තුළදී වාහනය නඩත්තු කිරීම සහ අලුත්වැඩියා කිරීම තරගකාරී මට්ටමකට ගෙනඒමයි. ඊට අමතරව ගනුදෙනුකරුවන්ට තරගකාරී විකල්පයන් කිහිපයක්ම ඒ හරහා ලැබෙනවා” යැයි අමාත්‍යාංශය පවසයි.