(සුජිත් හේවාජුලිගේ)

බැසිල් රාජපක්ෂ මහතාට පාර්ලිමේන්තුවේ තවදුරටත් යමක් කළ නොහැකි බව විසිදෙවෙනි ආණ්ඩුක්‍රම ව්‍යවස්ථා සංශෝධනය පිළිබඳ ඡන්ද විමසීමේදී හොඳින් පැහැදිලි වුණු බව සමගි ජන බලවේගය පක්ෂයේ කුරුණෑගල දිස්ත්‍රික් පාර්ලිමේන්තු මන්ත්‍රී ජේ සී අලවතුවල මහතා පැවසීය.

බැසිල් රාජපක්ෂගේ කීමට පිටින් ගොස් මන්ත්‍රීවරුන් එම සංශෝධනයට පක්ෂව ඡන්දය ප්‍රකාශ කළ බව පැවසූ මන්ත්‍රීවරයා අද බැසිල් රාජපක්ෂ මහතාට පාර්ලිමේන්තුවේ බලයක් නැති බවද සඳහන් කළේය.

මේ අතර ජනතාවට අද ජීවත්වීමට නොහැකි අන්ත දරිද්‍ර වාතාවරණයක් රටේ ගොඩ නැගී ඇති බවත් දරුවන්ට කන්න දීමට සියලු දේ උකස්කර තවදුරටත් උකස් කිරීමට ඔවුනට දෙයක් ඉතිරිව නොමැතිව හූල්ලමින් සිටින බවත් මන්ත්‍රීවරයා කීවේය.

පාසල් දරුවන්ගෙන් සියයට තිහක් පමණ ආහාර නොමැතිව පාසල් වලට පැමිණෙන බව සොයා ගෙන ඇතැයි ඔහු වැඩිදුරටත් පැවසීය.

ජේ සී අලවතුවල මහතා මෙසේ පැවසුවේ කොළඹදී අද (23) පැවති ප්‍රවෘත්ති සාකච්ඡාවකදීය.