බ්‍රිතාන්‍ය අගමැති ඩේවිඩ් කැමරන් විසින් සිංහල සහ දෙමළ අලුත් අවුරුද්ද වෙනුවෙන් සිය සුබපැතුම් පිරිනමා ඇත.

" බ්‍රිතාන්‍යයේත් ශ්‍රී ලංකාවෙත් ලොවවටාත් සිංහල සහ දෙමල අලුත් අවුරුද්ද සමරන සියලුම දෙනා වෙත සුබ පැතුම් පිරිනැමීමට කැමැත්තෙමි.

ලොව වටා විශාල ජනතාවක් මෙම වැදගත් චාරිත්‍රය සමරන බව මම දනිමි" යනුවෙන් අගමැතිවරයාගේ නමින් නිකුත්කර ඇති ලිපියක සඳහන් වෙයි.

බ්‍රිතාන්‍යයේ ජීවත්වන ශ්‍රී ලාංකික සිංහල සහ දෙමල ජනතාව විසින් මේ රට වෙනුවෙන් ඉටුකරනු ලබන උත්තම සේවාවන් නිරන්තරයෙන් අගය කරනු ලබන බවත් මෙම පිරිසගේ අධ්‍යාපනය, සෞඛ්‍ය, සංස්කෘතික සහ වාණිජ අංශයන්ගේ නියෝජනය ඉතාම වැදගත් වන බවත් ඔහු පවසා ඇත.

එම ලිපියෙහි  මෙසේ  ද සඳහන් වෙයි. "එංගලන්තයේදී නව අවුරුද්ද සමරන සියලුම දෙනා නියත වශයෙන්ම ශ්‍රී ලංකාවේ නෑදෑ හිතමිත්‍රාදීන් සිහිපත් කරනු නොඅනුමානය. පසුගිය වසරේදී ශ්‍රී ලංකාවේ කල සංචාරයේදී එරට වැසියන් දැක්වූ මිත්‍රශීලී බව සහ ආගන්තුක සත්කාරය මේ අවස්තාවේදී මගේ සිහියට නැගෙයි. එදා මා සංචාරය කල හැම තැනකදීම මුණ ගැසුන සාමාන්‍ය ජනතාව පෙන්වූ අසාමාන්‍ය ලෙන්ගතුකම වගේම එම රටේ ඇති ඇති විශිෂ්ට සුන්දරත්වය මගේ මතකයෙන් කිසිදිනක ගිලිහී නොයනු ඇත."

ලැබුවාවූ නව වසර ඇතුලත ශ්‍රී ලංකාවේ ප්‍රධාන ජන කොට්ඨාශයන් තව දුරටත් එකමුතුව ක්‍රියා කරනු දැකීමට ලැබේවායි ප්‍රාර්ථනා කරනු කැමති බවද එම ලිපියෙහි දැක්වෙයි.

ලන්ඩන් නුවර කොන්සර්වේටිව් පක්ෂයේ ශ්‍රී ලාංකික මිතුරු සන්සධයේ සභාපති ලයනල් සමරසිංහ වෙත එම ලිපියෙහි පිටපතක් ඒවා තිබුණි.