බෞද්ධ විද්වතකු, ගත් කතුවරයකු, කීර්තිමත් සිවිල් සේවකයකු හා තානාපතිවරයකු ද වූ ආචාර්ය ආනන්ද ඩව්ලිව් පී ගුරුගේ (87) අභාවප්‍රාප්ත විය.

ඕස්ට්‍රේලියාවේ සරසවියක දේශන පවත්වා ඇමෙරිකාවට යමින් සිටිය දී ගුවන්යානයක දී අභාවප්‍රාප්ත වූ බව වාර්තා වේ.

දේහය දැනට අමෙරිකාවේ ලොස් ඇන්ජලීස් ගුවන්තොටේ තබා ඇත.

වෙස්මිනිස්ටර්හි දී ඉරිදා (10) අවසන් කටයුතු සිදු කිරීමට නියමිතය.

ආචාර්ය ගුරුගේ ඉපැදුණේ ගාල්ලේය.

සිංහල, පාලි, සංස්කෘත, ඉංග්‍රීසි ඇතුළු භාෂා කිහිපයක ප්‍රවීණත්වය හිමිකරගෙන සිටි ආචාර්ය ගුරුගේ මහාවංශය ඉංග්‍රීසියට පෙරළීය.

ඔහු විසින් ලියන ලද ග්‍රන්ථ සංඛ්‍යාව හැටකට ආසන්නය.

බෞද්ධ ඳර්ශනය පිළිබඳ ලොව විශාරද දැනුමක් හිමිකරගෙන සිටි ජගත් කීර්තියට පත් විද්වතෙකි.

1956 පැවැත්වුණු බුද්ධ ජයන්ති මහෝත්සවයේ සංවිධානය කිරීමට පත් කළ ලංකා බෞද්ධ මණ්ඩලයේ ලේකම් වශයෙන් ද කටයුතු කළේ ගුරුගේ මහතාය.

වයස අවුරුදු 23 දී සිවිල් සේවා විභාගයෙන් සමත්වී යාපන කච්චේරියේ මුල්ම පත්වීම ලද ආචාර්ය ගුරුගේ අධ්‍යාපන අමාත්‍යංශයේ ලේකම් ද විය. ඉන් පසු විදේශ සේවයට එක් විය.

එක්සත් ජාතීන්ගේ ශ්‍රී ලංකා නිත්‍ය නියෝජිත ද විය.

ඔහු කැලිෆෝනියා විශ්ව විද්‍යාලයේ බෞද්ධ දර්ශනය හා හින්දු සමය පිළිබඳ මහාචාර්ය වරයකු ද විය.

ආචාර්ය ගුරුගේ ඩඩ්ලි සේනානායක හා සර් ජෝන් කොතලාවල අගමැතිවරුන්ගේ සහකාර ලේකම්වරයෙක් ද වූයේය.

මහනුවර ධර්මරාජ විද්‍යාලයයෙන් අධ්‍යාපනය ලැබූ ඔහු 1947 දී කොළඹ විශ්ව විද්‍යාලයයෙන් සංස්කෘත භාෂාව පිළිබඳ විශේෂ ගෞරව උපාධිය දිනා ගත්තේය.

අනතුරුව රජයේ ශිෂ්‍යත්වයක් ලැබ ලන්ඩන් විශ්ව විද්‍යාලයයටගොස් ආචාර්ය උපාධිය දිනා ගත්තේය.

ඔහුගේ හැට වැනි උපන් දිනයේ දී ආනන්ද ඩබ්ලිව් පී උපහාර ග්‍රන්ථය ඔහුට පිළිගැන්වීය.