(ගයාන් සූරිය ආරච්චි)

වහාම ක්‍රියාත්මක වන පරිදි උසස් නිලධාරීන් ඇතුළු සියලුම පොලිස් නිලධාරීන්ගේ නිවාඩු සහ දින විවේක ලබන 30 දක්වා අවලංගු කර ඇතැයි පොලිස් මාධ්‍ය ප්‍රකාශක සහකාර පොලිස් අධිකාරි උදය කුමාර වුට්ලර් මහතා පැවසීය.

දුම්රිය ඇතුළු පොදු ප්‍රවාහන සේවාවන් ඔස්සේ රාජකාරිය වෙත පැමිණෙන නිලධාරීන් තමාට ආසන්නම පොලිසියට පැමිණ රාජකාරී වාර්තා කිරීමට සූදානම්ව සිටින ලෙසත් පොලිස් මාධ්‍ය ප්‍රකාශකවරයා කීය.

ආපදා කළමනාකරණය සිදු කරන අවස්ථාවලදී මහා මාර්ග රාජකාරියේ නිරතව සිටින පොලිස් නිලධාරීන්ට සහාය දක්වමින් අනතුරුදායක ලෙස වසා ඇති මාර්ගවල ගමන් කිරීමෙන් වළකින ලෙසද වුට්ලර් මහතා පැවසීය.

ගංවතුර ඇතුළු ආපදා තත්ත්ව පවතින අවස්ථාවක 117 ආපදා කළමනාකරණ මධ්‍යස්ථානයද, 119 පොලිස් හදිසි ඇමතුම් අංකයද, 1990 සුවසැරිය ගිලන් රථ සේවාව, 110 ගිනි නිවන සේවාව, 113 යුද හමුදා මූලස්ථානයද 116 ගුවන් හමුදා මූලස්ථානය ද ඇමතිය හැකිය.