රගර් ක්‍රීඩක වසීම් තාජුඩීන්ගේ මරණ පරික්ෂණයේ මුලික කටයුතු වලදී  පොලිසියේ ඉහළ නිලධරයන්ගේ ඇඟිලි ගැසිම් ගැන රහස් පොලිසිය කරුණු සොයා ගෙන ඇතැයි රජයේ ජ්‍යෙෂ්ඨ නීතිඥ ඩිලාන් රත්නායක මහතා කොළඹ අතිරේක මහේස්ත්‍රාත් නිශාන්ත පිරිස් මහතා හමුවේ අද (12) කරුණු  දැක්වීය.

රහස් පොලිසිය පොලිස් නිලධරයන් විසි දෙනෙකුගේ කටඋත්තර ලියාගෙන ඇතැයි ද ඔවුන්ගේ ප්‍රකාශ එකිනෙක පරස්පර  යැයි ද ඔහු ද කිවේය. ශ්‍රී ලංකා වෛද්‍ය සභාව වෙනුවෙන් පෙනී සිටි චතුර ගල්හේන කියා සිටියේ මුල් පශ්චාත් මරණ පරික්ෂණය පැවැත්වු හිටපු ප්‍රධාන අධිකරණ වෛද්‍ය නිලධාරි  ආනන්ද සමරසේකර  ඇතුළු අධිකරණ වෛද්‍ය  නිලධාරි  කණ්ඩායමේ ක්‍රියාකලාපය සොයා බැලීමට විනය කමිටුවක් පත් කර  ඇති බවයි.එම කමිටුව හමුවට ලබන ජුනි මාසයේ දී  පැමිණෙන ලෙස ඔවුනට  දන්වා ඇතැයි ද ගල්හේන මහතා  කියා සිටියේය.

රජයේ නිතිඥ රත්නායක මහතා තවදුරටත්  කරුණු දක්වමින් කියාසිටියේ තාජුඩීන්ගේ මුදල් පසුම්බිය කිරුලපන දී සොයා ගත්  අවස්ථාවේ දී නාරහේන්පිට පොලිසියේ අපරාධ අංශයේ ස්ථානාධිපති උපුල් ධම්මික ගුණතිලකගේ හැසිරිම ප්‍රශ්නකාරි බවයි.

දැනට  රිමාන්ඩ් බාරයේ සිටින ඔහු ලබන 26 වැනි දා දක්වා තවදුරටත් රිමාන්ඩ් කරන ලෙස නියෝග කළේය.

තාජුඩීන් හා සැකකරුවන් අතර  පැවති බව කියන දුරකථන කතාබහේ තොරතුරු සම්බන්ධ විස්තර රහස් පොලිසියට දෙන්නැයි මොබිටෙල් සමාගමට මහේස්ත්‍රාත් නියෝග කළේය.

කැනඩාව හා එංගලන්තයේ විද්‍යාඥයන්ගේ සහායෙන් ආරක්ෂිත කැමරා  වීඩියෝ ගැන රහස් පොලිසිය  සොයා බලන බවද රත්නායක මහතා  කියා සිටියේය.