ප්‍රංශයේ කොරෝනා ආසාදිත මරණ සංඛ්‍යාව 20,000 ඉක්මවා ගොස් ඇත.

ඒ අනුව ලෝකයේ, කොරෝනා මරණ සංඛ්‍යාවෙන් 20,000 සීමාව පසුකළ හතරවන රට බවට ප්‍රංශය පත්වී තිබේ.

මීට පෙර ඉතාලිය, ස්පාඤ්ඤය සහ ඇමරිකාව මෙම සීමාව පසු කළේය.

අද (21) වනවිට ප්‍රංශයෙන් වාර්තා වන මරණ සංඛ්‍යාව 20,265 කි.

නව මරණ 547ක් වාර්තා වී ඇති අතර එයින් මරණ 444ක් රෝහල් වල සහ 103 ක් සාත්තු නිවාස වල සිදුවී තිබේ.

කෙසේ වුවද එරට සෞඛ්‍ය අංශ පෙන්වා දෙන්නේ පසුගිය දින කිහිපයක සිට දෛනික මරණ අගයන් යම් පමණකින් අඩුවෙමින් පවතින බවයි.

ප්‍රංශයේ මේ වනවිට කොරෝනා ආසාදිත රෝගීන් 155 383ක් වාර්තා වන අතර රෝගීන් 37 409ක් සුවය ලබා තිබේ.

දැඩි සත්කාර ඒකක වල සිටින රෝගීන් සංඛ්‍යාව 5 683කි.

සති පහකට ආසන්න කාලයක් තිස්සේ ප්‍රංශය සම්පූර්ණයෙන් අගුලු දමා ඇත.

ප්‍රංශ රජය පවසන්නේ මැයි මාසයේ සිට යම් ආකාරයක ලිහිල් කිරීම් සිදු කිරීමට සැලසුම් කර ඇති බවයි.

කෙසේ වුවද ප්‍රංශයේ සාත්තු නිවාස වල සංචාරය කිරීම සහ අමුත්තන්ගේ පැමිණීම දැඩි ලෙස තහනම් කර ඇත.

ප්‍රංශයේ සිදුවූ කොරෝනා ආසාදිත මරණ වලින් 40%කට ආසන්න ප්‍රමාණයක් වැඩිහිටි පුද්ගයන් වෙසෙන සාත්තු නිවාස වලින් වාර්තා වන හෙයින් මෙම තීරණය ගැනීමට සිදුවූ බව එරට රජය පවසයි.

(රොයිටර් පුවත් ඇසුරිණි - 085)