(සුජිත් හේවාජුලිගේ)

ඉදිරි මහ මැතිවරණයේදී බහුතර මන්ත්‍රී සංඛ්‍යාවක් දිනා ගැනීම සඳහා පොදු සන්ධාන පිහිටුවා ගැනීමට දේශපාලන පක්ෂ නම්මා ගැනීමේ විශේෂ මෙහෙයුමක් එක්සත් ජාතික පක්ෂය, සමග ජන බලවේගය ඇතුළු විපක්ෂයේ දේශපාලන පක්ෂ ආරම්භ කරනු ලැබ ඇතැයි දේශපාලන ආරංචි මාර්ග සඳහන් කළේය.

පොදු සන්ධාන පිහිටුවීම සඳහා දේශපාලන පක්ෂ නායකයන් සමඟ රහසිගත සාකච්ඡාද පසුගිය දිනවල කෙරුණු බව දැනගන්නට ඇත.

සන්ධාන පිහිටුවා ගැනීම සඳහා දේශපාලන පක්ෂ නම්මවා ගැනීමට එක්සත් ජාතික පක්ෂය සහ සමගි ජන බලවේගය වෙනම කණ්ඩායම්ද පත්කරනු ලැබ සිටිති.

පොදු සන්ධානයක් පිහිටුවා ගැනීම සඳහා එක්සත් ජාතික පක්ෂය සමග සම්බන්ධ වෙන ලෙස එම පක්ෂයේ නායකයෝ සමගි ජන බලවේගයේ මන්ත්‍රීවරුන් සහ සාමාජිකයන්ගෙන් පසුගියදා ඉල්ලීමක්ද කළහ.

මේ අතර ශ්‍රී ලංකා පොදු ජන පෙරමුණේ දිනේෂ් කණ්ඩායම ඉදිරි මහ මැතිවරණය වෙනුවෙන් ව්‍යවසායක දිලිත් ජයවීර මහතාගේ නායකත්වයෙන් යුතු මව්බිම ජනතා පක්ෂය සමඟ සන්ධාන ගතවීමට සාකච්ඡා අරඹා ඇත.

මේ සම්බන්ධයෙන් අප හිටපු අමාත්‍ය ප්‍රසන්න රණතුංග මහතාගෙන් කළ විමසුමකදී ඔහු පැවසුවේ ඒ සම්බන්ධයෙන් සාකච්ඡාවක් පසුගියදා කළ බවයි.

ශ්‍රී ලංකා පොදු ජන පෙරමුණේ හිටපු පාර්ලිමේන්තු මන්ත්‍රීවරයකු වන දිළුම් අමුණුගම මහතාද මව්බිම ජනතා පක්ෂය සමඟ එක්විය. ඔහුට එම පක්ෂයේ ජාතික සංවිධායක ධූරයද ඉන් අනතුරුව පිරිනැමිණ.

හිටපු ජනාධිපති රනිල් වික්‍රමසිංහ මහතාට පසුගිය ජනපතිවරණයේදී සහාය දීමට ඉදිරිපත්වූ ශ්‍රී ලංකා පොදු ජන පෙරමුණේ පාර්ලිමේන්තු මන්ත්‍රීවරුන් හිටපු අගමැති දිනේෂ් ගුණවර්ධන මහතාගේ සභාපතිත්වයෙන් පසුගියදා සන්ධානයක් පිහිටුවා ගනු ලැබීය. පොදු ජන එක්සත් නිදහස් පෙරමුණ එම සන්ධානයයි.

එම සංවිධානයේ ලේකම්වරයා ලෙස කටයුතු කරන්නේ හිටපු අමාත්‍ය වෛද්‍ය රමේෂ් පතිරණ මහතාය.

පොදු ජන එක්සත් නිදහස් පෙරමුණට තවත් පාර්ශ්ව සම්බන්ධ කර ගැනීම වෛද්‍ය රමේෂ් පතිරණ මහතා ඇතුළු කණ්ඩායමක් මේ දිනවල කටයුතු කරගෙන යන බව ආරංචි මාර්ග සඳහන් කළේය.

ශ්‍රී ලංකා නිදහස් පක්ෂයේ නිමල් සිරිපාල පාර්ශවය පොදු ජන එක්සත් නිදහස් පෙරමුණ සමග සන්ධානගත වීමට දැනටමත් එකඟත්වය පළකර ඇතැයි ප්‍රසන්න රණතුංග මහතා පැවසීය.

මේ අතර ඉදිරි මහ මැතිවරණයේදී වැඩි මන්ත්‍රී ආසන සංඛ්‍යාවක් දිනා ගැනීමට නම් එක්සත් ජාතික පක්ෂය සමග සම්බන්ධ විය යුතු බව සමගි ජන බලවේගයේ සාමාජිකයන් රැසක් එහි නායකත්වයට පෙන්වා දී ඇතැයි දැනගන්නට ඇත. කෙසේ වෙතත් පක්ෂයේ නායක සජිත් ප්‍රේමදාස මහතා ඊට තවමත් එකඟත්වයක් දක්වා නැත.