කාසියේ වාසිය දිනාගැනීමෙන් පසුව පාකිස්තානු පිලට පළමුවෙන් පන්දුවට පහර දීමට ආරාධනා කිරීමට ගත් තීරණය වැරදී ගිය බවත් එයින් අපේක්‍ෂිත ප‍්‍රතිඵල නොලැබුණු බවත් ශී‍්‍ර ලංකා පිලේ පුහුණුකරු ග‍්‍රැහැම් ෆෝඞ් මහතා පැවසීය. තරගයට නැවතත් අවතීර්ණ වීම සඳහා ශී‍්‍ර ලංකා පිලේ පළමු ඉනිම ඉතාමත් වැදගත් වන බවත් ශී‍්‍ර ලංකා පුහුණුකරුවා වැඩිදුරටත් පැවසීය. "ටෙස්ට් තරග කියන්නේ දින පහක් පුරා පැවැත්වෙන කී‍්‍රඩාවක්. මේ තත්ත්වය සඳහා අප හොඳින් ප‍්‍රතිචාර දැක්විය යුතුයි” යයිද සෙනසුරාදා කී‍්‍රඩාවෙන් අනතුරුව පැවැති පුවත් පත් සාකච්ඡාවේදී ෆෝඞ් මහතා පැවසීය. ශී‍්‍ර ලංකා පිල කාසියේ වාසිය දිනාගත් නමුත් පළමුවෙන් පන්දුවට පහර දීමේ අවස්ථාව පාකිස්තානු පිලට පැවරීම නිසා තරගයේ පළමු දිනය නිමා වන විට පාකිස්තානු පිල කඩුල්ලක් දැවී ලකුණු 334 ක් ලබා සිටියේය. ඒ වන විට ආරම්භක පිතිකරු මොහොමඞ් හෆීස් නොදැවී ලකුණු 172 ක් ලබා සිටි අතර අසාර් අලි නොදැවී ලකුණු 92 ක් ලබා සිටියේය. "පැහැදිළිවම, අපට එය වැරදුණා. ලකුණු පුවරුව දිහා බැලූවාම ඒ බව පේනවා” "අපේ කණ්ඩායමේ පළපුරුදු කී‍්‍රඩකයන් බොහෝ දෙනෙක් සිටිනවා. මේ තණතීරුව ගැන ඔවුන් බොහෝ දේ දන්නවා. ඒත් මේ තණතීරුව මේ ආකාරයට ප‍්‍රතිචාර දක්වයි කියා ඔවුන් කිසිවකු සිතන්න නැතිව ඇති.” යයි පළමුවෙන් පන්දුවට පහර දීමේ අවස්ථාව පාකිස්තානු පිලට පැවරීම සම්බන්ධයෙන් ග‍්‍රැහැම් ෆෝඞ් මහතා පැවසීය. "තරගයේ පළමු හෝරාවේ, නැතිනම් ඊට ටික වේලාවක් පසුවන තුරුත්, මේ තණතීරුවේදී පන්දු යවන්නන්ට කිසියම් වාසිදායක තත්ත්වයක් තිබෙනවා කියන එක  ඕනම කෙනෙක් දන්න දෙයක්.” "ගාල්ල ටෙස්ට් තරගයේ ඉනිම දෙකේදීම හොඳ ආරම්භයක් නොගත් පාකිස්තානු පිලේ කඩුල්ලක් දෙකක් වේලාසනින්ම දවාගන්න අපට පුළුවන් වුණා නම්, තත්ත්වය වෙනස් වෙනවා” යයිද ග‍්‍රැහැම් ෆෝඞ් මහතා වැඩිදුරටත් පැවසීය.