’’පාන් අඩු කලත් බනිස් අඩු කරලා නෑ’’

(මහින්ද නිශ්ශංක සහ කීර්ති ප්‍රනාන්දු)

පාන් රුපියල් 10 කින් අඩු කලත් බනිස් මාලු පාන් ඇතුළු සෙසු බේකරි නිෂ්පාදන වල මිල අඩු කර නැතැයි පාරිභෝගිකයෝ මැසිවිලි නගති.

ආනයනික තිරිඟු පිටි තොග මිල රුපියල් 250ට අඩු කිරිමෙන් පසු ග්‍රෑම් 450 පාන් ගෙඩියක් රුපියල් 10 කින් අඩු කළ  සමස්ත ලංකා බේකරි හිමියන්ගේ සංගමය ඊට සමගාමීව බනිස් ,මාලු පාන් ඇතුළු සෙසු බේකරි නිෂ්පාදන වල ද මිල රුපියල් 10 කින් පමණ අඩු කරන ලෙස සමස්ත බේකරි හිමියන් ගෙන් ඉල්ලීමක් කෙරිණ.

නමුත් දැනටත් බනිස් , සහ මාළු පාන් රුපියල් 60 සිට 100  වැනි මිල ගණන් වලට අලෙවි කරන බවද පාරිභෝගිකයෝ පවසති.

බනිස් සහ මාළු පාන්  ඇතුළු බේකරි නිෂ්පාදන වල මිල අඩු නොකිරීම පිළිබඳව විමසූ විට බේකරි හිමියන් කියා සිටියේ පිටි කිලෝවක්  රුපියල් 270 ,300, 350 වැනි වැඩි මිලට  මිලදී ගැනීමට සිදු වී ඇති නිසා  මාලු පාන් , බනිස්  මිල අඩු කළ නොහැකි බවයි .

බනිස් සහ මාළු පාන් මිල අඩු නොකිරීම පිළිබඳව සමස්ත ලංකා බේකරි හිමියන්ගේ සංගමයෙන් කළ විමසීමකදී එහි ප්‍රකාශකයෙකු කියා සිටියේ  තවමත් බේකරි හිමියන් ට වැඩි මිලට පිටි ගැනීමට සිදුවීම නිසා මෙසේ බනිස් සහ මාළු පාන් ඇතුළු නිෂ්පාදන වල මිල අඩු නොකිරීමට හේතු විය හැකි බවයි.