පසුගියදා හග්ගල මල්වත්තේ චිත්‍රපට රූපගත කිරීමක් අතරතුරදී සිදුවූ අපූරු සිද්ධියක් ගැනයි මේ සටහන.

මේ චිත්‍රපටයෙ ප්‍රධාන චරිතය රඟපාන්නෙ ජනප්‍රිය නිළි පූජා උමාශංකර්. මේ දිනවල අතිසාර්ථක ලෙස තිරගතවන "පත්තිනි" චිත්‍රපටයේ ප්‍රධාන චරිතය නිරූපණය කරන පූජාගේ දක්ෂතාවය වගේම ඇගේ නිහතමානී බව හා අව්‍යාජ බව ගැන අමුතුවෙන් කියන්න අවශ්‍ය නැහැනෙ.

දර්ශන තලය සකස් වනතුරු පූජා මිතුරියන් දෙදෙනෙකු සමඟ මල්වතතේ නවතා තිබුණු වෑන් රථයක් තුළ කතා කර කර හිටියලු. එක පාරටම ඇගේ අවධානය වෙන පැත්තකට යොමු වුණා.

"අනේ එක්ස්කියුස් මී, පොඩ්ඩක් ඔහොම ඉන්න. හොරු කට්ටියක් ඉන්නවා මට පේනවා. මම දුවලා ගිහිං එන්නම්" කියලා වෑන් රථයෙන් බැහැලා ඇය විදුලි වේගයෙන් දිව්වලු.

ඔන්න විනාඩි පහකින් විතර මොනවද කකා ලොකු හිනාවකුත් දාගෙන පූජා වෑන් එකට ආවලු. අර යාළුවො දෙන්නා අන්දුන් කුන්දුන්වෙලා බලන් ඉන්නවලු.

"කොහෙද පූජා වෙඩිල්ල වගේ බැහැලා දිව්වෙ?"

"අයියො නැහැ. පොඩි ආතා ආතල් එකක්," පූජා කිව්වලු.

"ආතා ආකල් එකක්?"

"ඔව් ඔව් අපේ crew එකේ කොල්ලො ටිකට ආතා ගෙඩියක් හම්බවෙලා. ඒ ගොල්ලො මට හොරෙන් ගහක් යටටවෙලා වැඩේ දෙනවා මම දැක්කා. ඒකයි මම දුවලා ගියේ. මාර ආතා ආතල් එක," ඇය සුපුරුදු ලෙස හිනාවෙමින් කිව්වලු.