(විමුක්ති එස් රුද්‍රිගු)

නව වසර උදාවන හෙට (01) දිනයේ ලෝක ජනගහනය බිලියන 8.09ක් වනු ඇතැයි ඇමෙරිකානු ජන සංඛ්‍යා ලේඛන දෙපාර්තමේන්තුව පුරෝකථනය කර ඇත.

ඒ අනුව 2024 වසරේදී ලෝක ජනගහනය මිලියන 71 කින් වැඩිවී ඇතැයි ඇමෙරිකානු ජන සංඛ්‍යා ලේඛන දෙපාර්තමේන්තුව පෙන්වා දුන්නේය. හෙට (01) දිනයේ ප්‍රක්ෂේපිත ලෝක ජනගහනය 8,092,034,511 ක් වනු ඇති බවත් ලෝක ජනගහනය 2024 වසරේ ජනවාරි පළමු වැනිදාට සාපේක්ෂව 71,178,087 (සියයට 0.89) කින් වැඩි වී ඇති බවත් ඇමෙරිකානු ජන සංඛ්‍යා ලේඛන දෙපාර්තමේන්තුව පැවැසුවේය.

එළැඹෙන ජනවාරි මාසයේ ගතවන සෑම තත්පරයකටම උපත් 4.2 ක් සහ මරණ 2 ක් ලෝකයේ වාර්තා වනු ඇතැයි අපේක්ෂා කරන බව ඇමෙරිකානු ජන සංඛ්‍යා ලේඛන දෙපාර්තමේන්තුව ප්‍රකාශ කළේය.

නමුත් 2023 වසරේදී ලෝක ජනගහනය මිලියන 75 කින් වැඩිවී ඇති බවත් එයට සාපේක්ෂව 2024 වසරේ ලෝක ජනගහනය ඉහළ යාමේ ප්‍රතිශතය පහළ යෑමක් පෙන්නුම් කරන බවත් එම දෙපාර්තමේන්තුව පැවැසුවේය.