(නිමන්ති රණසිංහ සහ අමිල සම්පත් ශ්‍රී )

යාල ජාතික වනෝද්‍යානයට ඇතුලු වී වන සතුන්ට හිංසා වන පරිදි අනිසි ලෙසින් නිති විරෝධීව හැසිරුනැයි කියන පුද්ගලයන් සම්බන්ධයෙන් විමර්ශණයක් පවත්වා ඊට අදාළ සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙසට තිස්සමහාරාම මහේස්ත්‍රාත් තරිදු සමීර සිල්වා මහතා වනජීවි දෙපාර්තමේන්තුවට අද (25) නියෝග කළේය.

මෙම සිද්ධියට අදාළ සී සී ටී වී දර්ශන පරීක්ෂා කිරීමෙන් පසු අදාළ වාහන අංක සම්බන්ධයෙන් මෝටර් රථ ප්‍රවාහන කොමිසාරිස් දෙපාර්තමේන්තුවෙන් වාර්තාවක් කැදවා විමර්ශනයන කරන ලෙසට ද මෙහිදී මහේස්ත්‍රාත්වරයා වනජීවි දෙපාර්තමේන්තුවට නියම කළේය.

මෙම පිරිස නියාමක මග පෙන්වන්නන්ගේ අවවාද නොතකා වනෝද්‍යානය තුළ වේග සීමා ඉක්මවින් වාහන ධාවනය කර ඇති බවත් එමගින් වනෝද්‍යානයේ සතුන්ට හිංසාවක් වන අයුරින් කටයුතු කර ඇති බවට කරුණු අනාවරණය වූ බවත් වනජීවි දෙපාර්තමේන්තුව අධිකරණයට කරුණු ඉදිරිපත් කර තිබේ.

මෙම පිරිස පාලනය කර ගත නොහැකි වූ මගපෙන්වන නියාමකවරුන් හත් දෙනා නියමිත වේලාවට කලින් එනම් එදින පස්වරු පහයි තිහට පමණ තම රාජකාරියෙන් ඉවත්වීමට කටයුතු කර ඇති බවට යාල උද්‍යාන භාරකරු සදහන් කළ බවද වනජීවි දෙපාර්තමේන්තුව අධිකරණයට කරුණු ඉදිරිපත් කළේය.