(අංජුල මහික වීරරත්න)

ජාත්‍යන්තර වෙළෙඳපොලට දැව හා දැව නිෂ්පාදන අපනයනය සඳහා දැනට පවතින නීතිමය බාධක සියල්ල ඉදිරි මාස දෙකේ ඉවත්  කරන  බව කෘෂිකර්ම වනජීවී හා වනසම්පත් සංරක්ෂණ අමාත්‍ය මහින්ද අමරවීර මහතා පැවසීය.

රාජ්‍ය දැව සංස්ථාව විදේශ විනිමය උපයන ආයතනයක් බවට පත් කිරීම රජයේ ඉලක්කය බව ද අමාත්‍යවරයා සඳහන් කළේය.

රාජ්‍ය දැව සංස්ථාව මෙි වසරේ සැප්තැම්බර් මස අවසන් වනවිට  රුපියල්  මිලියන 3735ක ලාබයක් උපයා තිබේ.

 අමාත්‍ය මහින්ද අමරවීර මහතා වනජීවී හා වන සම්පත් සංරක්ෂණ අමාත්‍යාංශයේ ප්‍රගතිය සම්බන්ධව කරන ලද සාකච්ඡාවක දී මෙම  තොරතුරු අනාවරණය විය.

මේ වනවිට රජය  විදේශ රටවලින් දැවමය ගෘහභාණ්ඩ මෙරටට ආනයනය කිරීම අත්හිටුවා තිබීම හේතුවෙන් රාජ්‍ය දැව සංස්ථාවේ ගෘහ භාණ්ඩ නිෂ්පාදන සඳහා ඉහළ ඉල්ලුමක් පවතින බව අමාත්‍යාංශය පවසයි.

මෙම වසර අවසන් වන විට රාජ්‍ය දැව සංස්ථාවේ ආදායම තවත් රුපියල් මිලියන 250කින්වත් ඉහළ නංවාගැනීම සඳහා පියවර ගන්නැයි අමාත්‍ය මහින්ද අමරවීර මහතා උපදෙස් දුන්නේය.

 දැනට රාජ්‍ය දැව සංස්ථාව සතුව කළුවර දැව මෙට්‍රික් ටොන් 500කට වඩා විශාල තොගයක් පවතින මෙයින් එම කළුවර දැව මිශ්‍රව යොදාගනිමින් ජාත්‍යන්තර වෙළෙඳපොලට  අපනයනය සඳහා ගෘහ භාණ්ඩ සැකසීමට පියවර ගන්නා ලෙස ද අමාත්‍යවරයා උපදෙස් දුන්නේය. එමෙන්ම ඉදිරි වර්ෂ කිහිපය තුළ දී ද මෙරටට ගෘහභාණ්ඩ ආනයනය කිරීම සඳහා රජය අවසර නොදෙන බවත් අමාත්‍යවරයා සඳහන් කළේය.