(සුජිත් හේවාජුලිගේ සහ අංජුල මහික වීරරත්න )

ඇමැතිකම් වැඩිවෙමින් ආණ්ඩුව ස්ථාවර තත්වයට පත්ව ඇති මොහොතක දරුවන් හිර කිරීම දැන් අවශ්‍ය නොවන බව සමගි ජන බලවේගය පක්ෂයේ බදුලු දිස්ත්‍රික් මන්ත්‍රී චමින්ද විජේසිරි මහතා පාර්ලිමේන්තුවේදී අද (18)  පැවසීය.

"අරගල කරලා ආණ්ඩුව එළවයි කියලා දැන් බයක් සැකක් තියාගන්න එපා" යැයිද  ඔහු සඳහන් කළේය.

ඔහු මෙසේ පැවසුවේ සභාවේ කටයුතු ආරම්භයේදී කතානායකවරයාගේ අවසරය ඇතිව ප්‍රකාශයක් කරමිනි.

අරගලයේ නිරත දරුවන් පැවසුවේ නිවැරදි දේ බව පැවසූ මන්ත්‍රීවරයා නිවැරදි දේ පැවසූ තරුණ දරුවන් සිරගත කිරීම  අසාධාරණ යැයිද සඳහන් කළේය.

දරුවන් සිර කිරීමෙන් ශ්‍රී ලංකාවට ආධාර ලබාගැනීමට  ගැටළු මතු වන බවත්  ජීඑස්පී සහනය පවා ඒ හේතුවෙන්  නොලැබී යා හැකි බවත් හෙතෙම පෙන්වා දුන්නේය.

මේ සම්බන්ධයෙන් කඩිනම් ක්‍රියාමාර්ග ගන්නැයි  රජයෙන් ඉල්ලීමක් කරන බව විජේසිරි මන්ත්‍රීවරයා වැඩිදුරටත් පැවසීය.