(මනෝප්‍රිය ගුණසේකර)

ශ්‍රී ලංකා නිදහස් පක්ෂයේ මහලේකම් දයාසිරි ජයසේකර මහතාගේ පක්ෂ සාමාජිකත්වය අත්හිටුවීමට ශ්‍රී ලංකා නිදහස් පක්ෂය ගෙන ඇති තීරණය ක්‍රියාත්මක කිරීම වළකාලමින් වාරණ නියෝගයක් නිකුත් කරන්නැයි දයාසිරි ජයසේකර මහතා කළ ඉල්ලීමට අවසර දීම කොළඹ දිසා විනිසුරු සඳුන් විතාන මහතා අද (08) ප්‍රතික්‍ෂෙප කළේය.

දයාසිරි ජයසේකර මහතා දැරූ ශ්‍රී ලංකා නිදහස් පක්ෂයේ මහලේකම් ධුරයට පත්කළ සරත් ඒකනායක මහතාට එම ධූරයේ කටයුතු කිරීම වළකාලමින් වාරණ නියෝගයක් නිකුත් කරන්නැයි දයාසිරි ජයසේකර මහතා කළ ඉල්ලීමට අවසර දුන් දිසා විනිසුරු සඳුන් විතාන මහතා සරත් ඒකනායක මහතාට ශ්‍රී ලංකා නිදහස් පක්ෂයේ මහලේකම් ධුරයේ කටයුතු කිරරීම ලබන 22 වැනිදා දක්වා වළකාලමින් වාරණ නියෝගයක් නිකුත් කළේය.

ශ්‍රී ලංකා නිදහස් පක්ෂයේ සිය පක්‍ෂ සාමාජිකත්වය අත්හිටුවීමට පක්ෂයේ සභාපති මෛත්‍රීපාල සිරිසේන මහතා ගෙන ඇති තීරණය අභියෝගයට ලක්කරමින් පක්ෂයේ මහලේකම්වරයා වශයෙන් කටයුතු කළ දයාසිරි ජයසේකර මහතා ගොනු කළ පෙත්සම සම්්බන්ධයෙන් ඉදිරිපත් වු කරුණු සළකා බැලු දිසා විනිසුරුවරයා අනතුරුව ශ්‍රී ලංකා නිදහස් පක්ෂ ව්‍යවස්ථාවේ 15 වැනි වගන්තිය ප්‍රකාරව පක්ෂ සාමාජිකත්වය සම්බන්ධයෙන් තීන්දු ගැනීමට පක්ෂයේ සභාපතිවරයාට පුළුල් බලතල පැවරී ඇතැයි සඳහන් කරමින් එලෙස නියම කළේය.

ශ්‍රී ලංකා නිදහස් පක්ෂයේ සාමාජිකත්වය අත්හිටුවීමට පක්ෂයේ සභාපති මෛත්‍රීපාල සිරිසේන මහතා ගෙන ඇති තීරණය අභියෝගයට ලක්කරමින් සහ තමා දැරූ ශ්‍රී ලංකා නිදහස් පක්ෂයේ මහලේකම් ධුරයට පත්කළ සරත් ඒකනායක මහතාට එම ධූරයේ කටයුතු කිරීම වළකාලමින් වාරණ නියෝගයක් නිකුත් කරන්නැයි ඉල්ලමින් පක්ෂයේ මහලේකම්වරයා වශයෙන් කටයුතු කළ දයාසිරි ජයසේකර මහතා වාරණ නියෝගයක් නිකුත් කරන්නැයි ඉල්ලමින් මෙම පෙත්සම ගොනු කොට ඇත.

(ඡායාරූප: ගයාන් අමරසේකර)