සමන් පාලිත නානයක්කාර , තරිඳු ජයවර්ධන, ඩයනා උදයංගනී

බණ්ඩාරවෙල දියතලාව මගී බස් රථයක පිපිරීමකින් පසු ඇතිවූ ගින්නකින් 19 දෙනෙකු තුවාල ලබා දියතලාව මුලික රෝහලට ඇතුළත් කළ බව පොලිසිය පවසයි.

බස් රථයේ තුන් වැනි පේළිය ආසන්නයේ පිපිරීම සිදුවී ඇති බව පෙනී යන්නේයැයි ද, පුපුරා ගියේ අත්බෝම්බයක් බවට සැක කරන්නේයැයි ද පොලිසිය කියයි.

රජයේ රස පරික්ෂක මේ වන විට සිද්ධිය සම්බන්ධයෙන් පරික්ෂණ ආරම්භ කර ඇත.

තුවාලකරුවන් අතර යුද හමුදා සාමාජිකයන් කිහිප දෙනකුද සිටින බව පොලිස් ආරංචි පවසයි.

යාපනයේ සිට බණ්ඩාරවෙලට අලුයම බස් රථයක් පැමිණි අතර එහි සිටි පිරිසෙන් කොටසක්  බණ්ඩාරවෙල සිට දියතලාවට යන බසයට නැඟ ඇතැයි පොලිසිය පවසයි.   පිපිරීම සිදුවී ඇත්තේ එම බණ්ඩාරවෙල දියතලාව බසයේ බව පොලිසිය සඳහන් කරයි.  බස්රථය දියතලාවේ සිට  යළි මහියංගණයේ හෙබරව දක්වා ධාවනය වීමට නියමිතව තිබිණි.  

යුද හමුදා සාමාජිකයන් දෙදෙනකුගේ පාදවල බරපතල තුවාල සිදුවී ඇති බවත් යුද හමුදා සාමාජිකයකුගේ ගමන් මල්ලේ මෙම අත්බෝම්බය තිබුණේදැයි සොයා බලන බවත් පොලිස් ආරංචි මාර්ග සඳහන් කරයි. 

මෙය කිසිසේත්ම ත්‍රස්ත ක්‍රියාකාරකමක් නොවන බවත්, යුද හමුදා පොලිසිය ද විශේෂ පරීක්ෂණයක් ආරම්භ කර ඇති බවත් යුද හමුදාව කියයි.

ඡායාරූප සැපයුම - රේඛා තරංගනී ෆොන්සේකා