ඔක්තෝබර් 8 වැනිදා පළාත් පාලන ඡන්දයෙන් ජයගත් ආයතන 21ක නගරාධිපතිවරු, නියෝජ්‍ය නගරාධිපතිවරු, සභාපතිවරු සහ උප සභාපතිවරු අරලියගහ මන්දිරයේදී ඉරිදා උදේ 9.47 යෙදුන නැකැතින් ජනාධිපති ඉදිරියේ දී දිවුරුම් දුන්හ. මෙම ඡන්දයේදී සන්ධානය විශිෂ්ට ජයග‍්‍රහණයක් ලැබුවත් එම ජයග‍්‍රහණය නමැති කිරි කලයට ගොම ටිකක් වැටුණු බැවින් එය සියලූ දෙනාම ඉදිරියේ දී පාඩමකට ගත යුතු යැයි ජනාධිපති මහින්ද රාජපක්‍ෂ මහතා එහි දී පැවසීය. ජනපති එසේ කීයේ කොලොන්නාවේ දී භාරත ලක්ෂ්මන් පේ‍්‍රමචන්ද්‍ර මහතා මරාදැමීම ගැන කියමිනි. සන්ධානය නමැති දැල ඔසවාගෙන ගොස් ජයග‍්‍රහණය කිරීම සඳහා එකතුවූ සියලූ පක්‍ෂ සාමාජිකයන් දායකවී ඇති බව අවධාරණය කළ ජනාධිපති ජයග‍්‍රහණයෙන් පසු දැහැටි දඩු මෙන් ඔවුන් ඉවතට විසි කිරිමේ ප‍්‍රතිපත්තියක් තමා ළඟ නැතැයි ද කීය. ආරක්‍ෂාව ඉල්ලා සිටින  ඕනෑම අයකුට ආරක්‍ෂාව සැලැසීම ජනාධිපති වශයෙන් තමා සතු වගකීමක්  යැයි ද අවශ්‍ය කරන භට පිරිස් තීරණය කරන්නේ ද තමා යැයි ද කීය. එය 10ක්, 12ක් හෝ 3ක් විය හැකියැයි කී ජනාධිපත සන්ධානයට එකතු වූ අයකු අද එකතු වුනාද ඊයේ එකතුවුනා ද යන්න ගැටළුවක් නොවේයැයි ද අවශ්‍ය වන්නේ ඔවුන්ගෙන් වැඩ ගැනීම යැයි ද කීය.