(රෝෂන් තුෂාර)

කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට ලබාදී  රජයට රුපියල් කෝටි දෙකකට අධික පාඩුවක් කළේ යැයි රක්ෂිත බන්ධනාගාර ගත රාජිත සේනාරත්න මහතා දැඩි ඇප කොන්දේසි මත මුදා හැරීමට කොළඹ ප්‍රධාන මහේස්ත්‍රාත්  අසංක එස් බෝදරගම  මහතා අද නියෝග කළේය.

සැකකරුට රුපියල් ලක්ෂ 05 ශරීරයක් මුදල් ඇපයක් රුපියල් ලක්ෂ විස්ස බැගින් වූ ශරීර ඇප තුනක් නියම කළ මහේස්ත්‍රාත්වරයා සැකකරුගේ විදෙස් ගමන් තහනම් කරන බවටද නියෝග කළේය.

විදෙස් ගමන් බලපත්‍රය අධිකරණයේ තැන්පත් කරන ලෙසද, අදාල නියෝගය ආගමන විගමන පාලකවරයාට නියෝගය යොමු කරන ලෙසද දන්වා සිටියේය.

ඇපකරුවන් දෙදෙනෙකු ළඟම ඥාතීන් විය යුතු බව දන්වා සිටි මහේස්ත්‍රාත්වරයා සියලු ඇපකරුවන්ගේ පදිංචිය  ග්‍රාම නිලධාරීවරයා මගින් සහතික කළ යුතු බවටද නියෝග කළේය.

රාජිත සේනාරත්න මහතාව පසුගිය 29 වැනි දින අත්අඩංගුවට ගෙන කොළඹ ප්‍රධාන මහේස්ත්‍රාත් අසංග එස් බෝදරගම මහතා හමුවට ඉදිරිපත් කිරීමෙන් පසුව අද 09 දින දක්වා රක්ෂිත බන්ධනාගාර ගත කර තිබිණි.

සැකකරු අධිකරණයට ඉදිරිපත් කළ අවස්ථාවේදී අල්ලස් කොමිසමේ නිලධාරීන් කරුණු දක්වමින් කියා සිටියේ  අදාල වැනි කැණීමේ ව්‍යාපෘතිය ලබා දුන් විදේශීය සමාගමේ අනුග්‍රහය ලබා ගෙන සැකකරු ,ඔහුගේ බිරිඳ හා  පවුලේ ඥාතීන් කොරියාවේ සංචාරයක නියැලීම සම්බන්ධයෙන් තවදුරටත් විමර්ශන සිදුකරන බවය.

එහෙයින්  සැකකරුගේ ඇප ඉල්ලීම ප්‍රතික්ෂේප කරන ලෙසද ඉල්ලා සිටියේය.

දෙපාර්ශ්වයේ කරුණු සලකා බැලූ මහේස්ත්‍රාත්වරයා  ඇප නියම කළේය.

2012 මැයි මස 10 දින  SCO.WOOD CO.LMT නැමැති කොරියානු සමාගම විසින් කිරින්ඳ ධීවර වරායේ වැලි කැණීම්කර, එම වැලි දේශීය වෙළඳපොළට නිකුත් කළ හැකි පරිදි ව්‍යාපෘතියක් පවත්වාගෙන ගෙන යාමට අනීතිකව අවසර ලබා දෙමින්  රජයට රුපියල් ලක්ෂ 262ක් පාඩු කිරීම සම්බන්ධයෙන් අල්ලස් කොමිසම සිදුකරන විමර්ශන වලට අදාළව මෙම විමර්ශනය සිදු කෙරේ.