බදාදා  මහ දවාලේ ලන්ඩන් නුවර වුලිච් පෙදෙසේදී බ්‍රිතාන්‍ය හමුදා භටයෙකුගේ හිස සිඳදැමීමේ සිද්ධියත් එම ඝාතනය සිදුකළ දෙදෙනෙකු ලෙයින් නෑවී ගිය මන්න පිහියා සහගිනි අවි අතැතිව මහ පාරේ බෙරිහන් දෙමින් සිටින අන්දමත් දැක්වෙන දර්ශන බ්‍රිතාන්‍ය රුපවාහිනිය මඟින් ප්‍රචාරය කිරීමත් සමඟම මුළු ලන්ඩනයම ත්‍රස්ත බියෙන් වෙළීගියේය. 

එසේ වීමට හේතුවුයේ හමුදා භටයාගේ ගෙළ සිඳින අවස්ථාවේ එම ඝාතකයන් "අල්ලා දෙවියන් සිහිකරමින් කෑ ගසනු ඇසුණු බව" සිද්ධිය ඇසින් දුටුවන් පැවසීමත් සමඟය. මේ නිසාමෙය ඉස්ලාම් අන්තවාදීන්ගේ ත්‍රස්ත්‍රවාදී ක්‍රියාවක් බවට අනුමාන කෙරුණි.

ඝාතකයින් දෙදෙනා නයිජීරියානු ජාතිකයින් බව සිද්ධියෙන් පසු නිකුත් කල පොලිස් නිවේදනයෙහි සඳහන් විය.

එම ඝාතකයින් දෙදෙනාගෙන් එක අයෙක් " උඹලාට මින්මතු කිසි ගැලවිල්ලක් නැහැ. අපේ උන්ට කරන දේට අපි තොපෙන් පළි  ගන්නවා. උන් අපට ගහනවා වගේ අපිත් උන්ට ගහන්න ඕනැ, ඇහැට අහැක් දතට දතක් ගන්න ඕනෑ" යනුවෙන් බෙරිහන් දෙනු රුපවාහිනියේ පෙන්වීය. ඔහු කතාකලේ ඉංග්‍රීසියෙන් වුවත් උච්චාරණහි විදේශීය බවක් පැහැදිලිව පෙනෙන්නට තිබිණි.

මහමඟ සිටි කෙනෙකු තම ජංගම දුරකථනයෙන් රුපගතකළ එම රුප රාමු මුලින්ම විකාශනය කැරුනේ සංස්කරණයකින් තොරව අමු අමුවේය.

ආරක්ෂක අංශ සැනෙකින්ම ත්‍රස්ත ප්‍රහාරයකදී ගතයුතු ක්‍රියාපටිපාටිය ක්‍රියාත්මක කළේය. මුළු පළාතම පොලිස්සහ හමුදා සෙබළුන් යොදා ආරක්ෂා කරවන ලද අතර මෙම සිද්ධියට සම්බන්ද වෙනත් අය හෝ සංවිධාන ඇත්දැයි සොයා බැලීම සඳහා ක්ෂණික පියවරක් ඇරැඹිණි.

මේවනවිට රාජකාරි කටයුත්තක් සඳහා ප්‍රංශයේ පැරිස් නුවරට ගොස් සිටින බ්‍රිතාන්‍ය අගමැති ඩේවිඩ් කැමරන් එම වැඩසටහන අතරමග නවතා දමා වහාම ලන්ඩන් නුවරට පැමිණීම සඳහා පිටත්විය." මෙය වචනයේ පරිසමාප්ත අර්ථයෙන්ම මේලේච්ඡ අසික්කිත අපරාධයක්. මේවා ත්‍රස්තවාදීන්ගේ වැඩ. මොවුන් පරාජය කිරීමට අපගේ ඇති අධිෂ්ඨානය කවදාවත් අඩුවන්නේ නැහැ" යයි කැමරන් සිද්ධිය සැලවූ විගස පැවසීය.

සිද්ධිය වුයේ වුලිච්හි පිහිටි  බ්‍රිතාන්‍ය කාලතුවක්කු හමුදා කඳවුර ඉදිරිපිටදීය.මියගිය සොල්දාදුවා " රණවිරුවන්ට සහය වෙමු" යනුවෙන් කියවෙන බැනියමක් ඇඳ සිටි බවට වාර්තාවිය. ඝාතකයින් අවට සිටි වෙනත් කිසිවකුහට තර්ජන කළේවත් එම ස්ථානයෙන් පැනයාමට උත්සාහ කළේවත් නැත. ඔවුන් අත ලෙයින් නැහැවුණ මාන්නපිහියා කිහිපයක් සහ ගිනි අවියක් තිබුන බවද ක්ෂණයකින් එතනට පැමිණි පොලිස් භටයින් විසින් දෙදෙනාටම වෙඩි තබන ලද බවද වාර්තාවල සඳහන්වෙයි. වෙඩිපහරට ලක්වතුවාල ලැබු ඔවුන් දැනට රෝහල් දෙකක දැඩි ආරක්ෂාව යටතේ රඳවා ගෙන ඇත.

බ්‍රිතාන්‍යයේ ක්‍රියාත්මකවන අන්තවාදී සංවිධානයක කණ්ඩායමක් ඊයේ සවස වුලිච් ප්‍රදේශයේ එක්රොක්වී කලබල ඇතිකිරීමට ගත උත්සාහයක් පොලිසිය විසින් වහාම මැඩ පැවැත්වීමට කටයුතු කළ බවද වාර්තාවිය.

'