කටාර් හි විදුලිබල පරිභෝජනය සීමාකිරීම සඳහා මේ දිනවල ක්‍රියාත්මක කෙරෙන ජාතික ව්‍යාපාරයේ තවත් පියවරක් ලෙසින් තාපදීප්ත ටංස්ටන් විදුලි බුබුළු (වොට් 75 සහ 100) ආනයනය කිරීම සහ අලෙවිය සම්බන්ධයෙන් බලපැවැත්වෙන තහනම පසුගියදා ක්‍රියාවට නැංවුණි.

නගර සභා සහ පරිසර අමාත්‍යාංශයේ සහයෝගය ඇතිව සංරක්ෂණ සහ බලශක්ති කාර්යක්ෂම ජාතික වැඩසටහන වන ටාර්ෂීඞ් හරහා අතිසාර්ථක ලෙසින් මෙම තහනම පැනවීමට හැකියාව ලැබුණු බව කටාර් පොදු විදුලිබල සහ  ජල සංස්ථාව (කරාමා) පවසයි.

“ටාර්ෂීඞ් වැඩසටහන හරහා විදුලිබල පරිභෝජනය සහ පීඩාකාරී කාබන් විමෝචනය අඩුකිරීමට කරාමා ආයතනය සිදුකළ කැපවීමේ තරම නව නීතිකරණය හරහා පැහැදිලිව පෙනෙනවා” යැයි කරාමා ආයතනය නිකුත් කළ නිවේදනයක දැක්වේ.

මෙම තහනම සම්බන්ධයෙන් රටේ ප්‍රධාන පෙළේ වෙළෙඳසල් කිහිපයකින් විමසූ විට ඔවුන් පැවැසුවේ ඔවුන් දැනටමත් අධික දීප්තියක් ලබාදෙන තාපදීප්ත විදුලි බුබුළු අලෙවි කිරීම නවත්වා ඇති බවයි.

මෙම තහනම ඉදිරියේදී වොට් 60 සහ 40 විදුලි බුබුළුවලටත් හඳුන්වාදීමට නියමිතය. තාපදීප්ත විදුලි බුබුළුවලින් සිදුවන අහිතකර බලපෑම් සම්බන්ධයෙන් ජනතාව දැනුම්වත්කොට විදුලිය අඩුවෙන් වැයවන විදුලි බුබුළු පාවිච්චිය ජනප්‍රිය කරවීම සඳහා ටාර්ෂීඞ් වැඩසටහන හරහා කරාමා ආයතනය පසුගිය කාලයේදී විවිධ ව්‍යාපෘති රැසක්ම ක්‍රියාත්මක කළ බව ඉහත නිවේදනයේ වැඩිදුරටත් දැක්වේ. 

අධික දීප්තියෙන් යුතු විදුලි බුබුළු ආනයනය කිරීම සහ බෙදාහැරීම වැළැක්වීම සඳහා නගර සභා සහ පරිසර අමාත්‍යාංශය විසින් පරීක්ෂණ වැඩසටහන් රැසක්ම ආරම්භ කර ඇත.

තාපදීප්ත විදුලි බුබුළුවලට වඩා විදුලිය සියයට 80කින් ඉතිරි කරන එල්ඊඩී විදුලි බුබුළු පාවිච්චිය සඳහා ජනතාව යොමුකරවීමටද පසුගිය කාලයේදී විවිධ දැනුම්වත් කිරීමේ වැඩසටහන් ක්‍රියාත්මක විය.