වසර 2008 අපේ‍්‍රල් මාසයේ සිට හිස්ව පවතින ජාතික මලල ක‍්‍රීඩා පුහුණුකරු ධුරය සඳහා ඒ.සී. ඩර්වින් පෙරේරා මහතා පත් කිරීමට ක‍්‍රීඩා අමාත්‍යාංශය අනුමැතිය දී ඇතැයි වාර්තා වේ. වසර 2008 අපේ‍්‍රල් 6 වෙනිදා එවකට ජාතික මලල ක‍්‍රීඩා පුහුණුකරු ධුරයේ කටයුතු කළ ලක්‍ෂ්මන් ද අල්විස් මහතා හදිසි අනතුරකින් මියයාමෙන් පසු එම ධුරය මේ දක්වා හිස්ව පැවතුණි. ඒ සඳහා සුදුස්සකු නම් කිරීමට ශ්‍රී ලංකා මලල ක‍්‍රීඩා සංගමය එකී කාලය තුළදී අපොහොත්වීම එම ධුරය එතෙක් හිස්ව පැවතීමට හේතු විය. මේ අතර ලබන පෙබරවාරි මාසයේ නවදිල්ලි නුවරදී පැවැත්වෙන 11 වැනි සාග් ක‍්‍රීඩා උළෙලේදී ශ්‍රී ලංකා මලල ක‍්‍රීඩා කණ්ඩායමේ කළමනාකරු ලෙස සුනිල් ජයවීර මහතා නම් කිරීමට පෙරේදා (31) රැස්වූ ශ්‍රී ලංකා මලල ක‍්‍රීඩා සංගමයේ මධ්‍යම කමිටුව තීරණය කළේය. ජාතික මලල ක‍්‍රීඩා පුහුණුකරු ධුරයට පත් ඩර්වින් පෙරේරා මහතා වසර 2002 සිට 2007 දක්වා මීට පෙරත් එම ධුරයේ කටයුතු කර තිබේ. ක‍්‍රීඩා අමාත්‍යාංශයේ හිටපු ක‍්‍රීඩා නියෝජ්‍ය අධ්‍යක්‍ෂ ධුරයේ වසර ගණනාවක් ද කටයුතු කළ ඔහු වසර 2005-06 කාලසීමාවේදී මලල ක‍්‍රීඩා සංගමයේ සභාපති ධුරයේ ද කටයුතු කළේය. සුනිල් ජයවීර මහතා කොළඹදී පැවැති 15 වැනි ආසියානු කනිෂ්ඨ මලල ක‍්‍රීඩා තරගාවලියේ මෙහෙයුම් කමිටුවේ ප‍්‍රධානියා ලෙසත් කටයුතු කළේය.