(ඩයනා උදයංගනී)

ගහලා පැන්නුවත් ශ්‍රී ලංකා නිදහස් පක්ෂය හැර යන්නේ නැතැයි එහි හිටපු ජ්‍යෙෂ්ඨ උප සභාපති, අමාත්‍ය නිමල් සිරිපාල ද සිල්වා මහතා පැවසීය.

තමන් මෙන්ම ශ්‍රී ලංකා නිදහස් පක්ෂය නියෝජනය කරමින් රජයට සහය දක්වන කණ්ඩායම නියෝජනය කරන නවදෙනාම ශ්‍රී ලංකා නිදහස් පක්ෂය හැර නොයන බවද ඇමතිවරයා සඳහන් කළේය.

තම කණ්ඩායම පක්ෂ අභ්‍යන්තර ප්‍රජාතන්ත්‍රවාදය හා පාක්ෂිකයා ආරක්ෂා කිරීමට සටනක් ගෙන යන බවත්, මෙම දේශපාලන භූමිකාව ගෙනයන්නේ ශ්‍රී ලංකා නිදහස් පක්ෂ කණ්ඩායමක් ලෙස බවත් හෙතෙම සඳහන් කළේය.

නිමල් සිරිපාල ද සිල්වා මහතා මේ බව පැවසුවේ කෘෂිකර්ම අමාත්‍යාංශයෙදී අද (24) පැවති මාධ්‍ය හමුවක් අමතමිනි.

ශ්‍රී ලංකා නිදහස් පක්ෂය යනු ගොඩනැගිල්ල, බෝඩ්ලෑල්ල හෝ අවස්ථාවාදීන් කිහිපදෙනකු නොවන බවද නිමල් සිරිපාල මහතා පැවසීය.

සර්වපාක්ෂික රජයක් පිහිටුවීම හා රජයට සහයදීම සම්බන්ධයෙන් වත්මන් ජනාධිපතිවරයා වෙත පළමුව යෝජනාවක් ගෙන ආවේ ශ්‍රී ලංකා නිදහස් පක්ෂ සභාපති මෛත්‍රීපාල සිරිසේන මහතා බවත් ඔහු අමාත්‍යධූර සම්බන්ධයෙන් සාකච්ඡා කිරීමට පක්ෂ නියෝජිතයන් කන්ඩායමකට අවස්ථාව දෙන්නැයි ඉල්ලා ඉකුත් මැයි මස 15 වැනිදා ජනාධිපතිවරයාට ලිපියක්ද යොමු කළ බවත් ඇමතිවරයා කීය.

ඊර්ෂ්‍යාව, කුහකකම හා හීනමානය පදනම් කරගෙන තවදුරටත් දේශපාලනය කළ නොහැකි බව කී ඇමතිවරයා මේ අවස්ථාවේ රට ගොඩනැගීමට සියලුදෙනා ඒකරාශී විය යුතු බවද පැවසීය.