ඊශ්‍රායලය ගාසා තීරයේ ජන සංහාරයක් සිදු කරන බව හමාස් සංවිධානයේ නායක ඉස්මේල් හනියේ රූපවාහිනිය ඔස්සේ ජනතාව අමතමින් පැවසුවේය.

ඇමෙරිකාව සහ තවත් යුරෝපා රටවල් කිහිපයක් සමඟ එකතු වී ඊශ්‍රායලය මෙම ජන සංහාරය සිදු කරන බව හමාස් නායක හනියේ චෝදනා කළේය.

පලස්තීන ජනතාව තම නිවාසවල රැඳී සිටින බවත් ගාසා තීරය අතහැර ඔවුන් ඊජිප්තුවට පළා නොයනු ඇති බවත් හනියේ පෙන්වා දුන්නේය. තම නිවාස අතහැර පළා නොයන පලස්තීන ජනතාවට තම ආචාරය හිමිවන බවද ඔහු පැවසුවේය.

ලෙබනනයේ හිස්බුල්ලා කණ්ඩායම යුද්ධයක සියලු පැතිකඩ සැලකිල්ලට ගෙන ඇති බවත් හමාස් සංවිධානයට වඩා හිස්බුල්ලා සංවිධානය බලවත් බවත් ඉරාන විදේශ කටයුතු අමාත්‍ය හොසේන් අමීර් අබ්දුල්ලාහියන් ප්‍රකාශ කර ඇත.

හිස්බුල්ලා සංවිධානයේ ප්‍රධානී සයේඩ් හසාන් නසරල්ලා හමුවූ අවස්ථාවේ ඔහු මේ බව ප්‍රකාශ කළ බව අබ්දුල්ලාහියන් පැවසුවේය. ඒ හේතුවෙන් ප්‍රමාද වැඩි වීමට පෙර ගාසා තීරයට එල්ල කරන ප්‍රහාර නැවැත්විය යුතු බවත් හිස්බුල්ලා සංවිධානය ඊශ්‍රායලයට පහර දීමට තීරණය කළහොත් ගැටලුව තවත් නරක අතට හැරෙනු ඇති බවත් ඉරාන විදේශ කටයුතු අමාත්‍යවරයා ප්‍රකාශ කළේය.

මේ වන විට බ්‍රිතාන්‍යද ඊශ්‍රායලයට සහාය පළ කර ඇති අතර හමාස් සංවිධානය ඊශ්‍රායලයට එල්ල කළ ප්‍රහාරයට ප්‍රතිචාර වශයෙන් නැගෙනහිර මධ්‍යධරණී මුහුදට හමුදා යාත්‍රා සහ නිරීක්ෂණ ගුවන් යානා එවීමට බ්‍රිතාන්‍ය තීරණය කළ බව අගමැති රිෂි සුනක් නිවේදනය කළේය.

ඊශ්‍රායලය එල්ල කරන ගුවන් ප්‍රහාර පසුගිය පැය කිහිපයේදී දැඩි කර ඇති බවත් ආරම්භ වන වේලාව පැවසීමට අපහසු වුවත් ඉතාමත් ඉක්මණින් ඊශ්‍රායල හමුදාව ගොඩබිමින් ගාසා තීරය ආක්‍රමණය කරනු ඇති බවත් විදෙස් මාධ්‍ය වාර්තා කර ඇත. ඊශ්‍රායල අග්‍රාමාත්‍ය බෙන්ජමින් නෙදන්යාහුද මීළඟ මෙහෙයුම ඉතාමත් ඉක්මණින් ආරම්භ වන බව ගාසා තීරය ආසන්නයේ රැඳී සිටින හමුදාවට දැනුම් දී තිබේ.

එසේම පලස්තීනුවන් වෙනුවෙන් පිහිටුවා ඇති ආරක්ෂිත නවාතැන් තවදුරටත් ආරක්‍ෂිත නොවන බවත් මිලියන 2 කට වැඩි පලස්තීන ජනතාවට ජලය ලබා ගැනීම ගැටළුවක් වී ඇති බවත් එක්සත් ජාතීන්ගේ සංවිධානය පවසා ඇත.

(විදෙස් මාධ්‍ය ඇසුරෙන් විමුක්ති එස් රුද්‍රිගු)