(තිලකරත්න දිසානායක)

දින කිහිපයක සිට ඇද හැලෙන ධාරානිපාත වර්ෂාව හේතුවෙන් ගම්පහ නගරය ආසන්නයෙන්  ගලා බසින අත්තනගලු ඔය සහ ඌරුවල්ඔය ස්ථාන කිහිපයකින්ම පිටාර ගැලීම මත ගම්පහ නගරය ඊයේ රාත්‍රියේ සිට ජලයෙන් යට වෙමින් පවතී.

මේ වනවිට ගම්පහ නගරය මෙන්ම නගරයට පිවිසෙන සියලුම මාර්ග, අතුරු මාර්ග සහ අවට ප්‍රදේශ ගණනාවක් ජලයෙන් යටවී තිබෙන අතර ජන ජීවිතයට මෙය දැඩිව බලපා ඇත.

ගම්පහ ප්‍රධාන රෝහලටද ජලය ගැලීම හේතුවෙන් බාහිර රෝගී ප්‍රතිකාර අංශය අඩි දෙකක් පමණ ජලයෙන් යටව පවතින අතර රෝහලට වෙනත් රෝහල්වලින් රැගෙන එන රෝගීන් බාර ගැනීමේ ගැටළුවකට පත්ව ඇති බව රෝහල් ප්‍රකාශකයෙකු සදහන් කළේය.

නගරය මෙන්ම දුම්රිය ස්ථානයේ දුම්රිය මාර්ග , බස් නැවතුම් පොළ ආදී ස්ථානද මේ වනවිට ජලයෙන් යටව පවතී.

පවතින තත්ත්වය සම්බන්ධයෙන් වාරිමාර්ග දෙපාර්තමේන්තු කාර්යාලයෙන් කළ විමවිමසීමේදී එහි ප්‍රකාශකයෙක්  සදහන් කර සිටියේ , මේ වනවිට ගම්පහ දිස්ත්‍රික්කයට වර්ෂාව ඇදහැලීම මද වශයෙන් නතරවී ඇතත් ඉහළ ප්‍රදේශවලින් පහලට ජලය ගලා ඒම මත ඌරුවල්ඔයෙහි ජල මට්ටම ඉහළ යමින් පවතින බවත් පවතින තත්ත්වය පාලනය කිරීම පිනිස මොරැන්න අමුණ ද ඊයේ සවස විවෘත කිරීමට පියවර ගනු ලැබූ බවත්ය.

අද උදෑසන වනවිට අත්තනගලු ඔය කොළඹ - මහනුවර මාර්ගය අවහිරවන ලෙසින් මහවිට ප්‍රදේශයෙන් පිටාර ගැලීම මත රථවාහන ගමනා ගමනයට බාධා සිදුව පවතී.

අත්තනගලු ඔය සහ ඌරුවල්ඔය පිටාර ගැලීම සිදුවීමට ඉඩ ඇති බැවින් ගම්පහ නගරය ඇතුලු අවට ප්‍රදේශයන්හි ජනතාවට ඒ පිළිබඳව දැනුම් දෙමින් අනාරක්‍ෂිත ස්ථානවලින් ඉවත්ව ආරක්ෂිත ස්ථාන වෙත යාමට පියවර ගන්නා ලෙස ගම්පහ දිස්ත්‍රික් ලේකම් කාර්යාලය ඇතුලු අදාල බලධාරීන් විසින් දැනුවත් කිරීම සිදු කෙරිණි.

ගම්පහ දිසාපති ලලින්ද ගමගේ මහතා සදහන් කර සිටියේ , දිස්ත්‍රික්කයේ පීඩාවට ලක්ව සිටින ජනතාවට අවශ්‍ය සහන සැලසීම පිනිස ප්‍රාදේශීය ලේකම්වරුන් පියවර ගනිමින් සිටින බවය.

ඡායා උපාලි රණවීර