ඛනිජ තෙල් සමාගමෙන් ’’ඕටී’’ වාර්තාවක්

(සුජිත් හේවාජුලිගේ )

ලංකා ඛනිජ තෙල් තොග ගබඩා පර්යන්ත සමාගමේ සේවකයන් 19 දෙනකුට  පසුගිය 2021  වර්ෂයේදී  ඔවුන්ගේ  මූලික වැටුප මෙන් සියයට 300කට වැඩි  අතිකාල දීමනා ගෙවා ඇතැයි ජාතික විගණන  කාර්යාලය නිකුත් කළ වාර්තාවක සඳහන් වේ.

ලංකා ඛනිජ තෙල් තොග ගබඩා පර්යන්ත සමාගමේ  අතිකාල   වැඩ සඳහා සැබෑ අවශ්‍යතා නොමැති අවස්ථාවවලදී පවා  සේවකයන් විශාල පිරිසකට මෙලෙස  රුපියල් කෝටි ගණනක අතිකාල ගෙවීම ආර්ථිකමය වශයෙන් විශාල පාඩුවක් බව  ජාතික විගණන කාර්යාලය පවසයි.

තවද සේවකයන් 210 දෙනකු සිය මූලික වැටුප මෙන්  සියයට දෙසීයකට වැඩි  අතිකාල දීමනාද සේවකයන් 988 දෙනකු තම මූලික වැටුපෙන් සියයට සීයකට වඩා අතිකාල දීමනාද සේවකයන්1335 දෙනකු (සමාගමේ 2638ක්වූ මුළු සේවක සංඛ්‍යාවෙන් සියයට පනහකට වැඩි පිරිසක්) සියයට 75 කට වැඩි අතිකාල දීමනාද 2021 වර්ෂයේදී  ලබාගෙන  ඇතැයි එම වාර්තාවේ දැක්වේ.

මේ අතර ණය ආපසු අය කර ගැනීමේ හැකියාව සමාලෝචනය නොකර තව තවත් ණය ගැනීමට සේවකයන් දිරිමත් කර තිබූ බව  පෙන්වා දෙන   විගණන වාර්තාව සේවකයන්ට ලබා දී ඇති කාර්යමණ්ඩල ණය අය කර ගැනීමේ පදනමක් ලෙස ඔවුනට අතිකාල වැඩ සඳහා මෙසේ වැඩි අවස්ථා දී තිබූ බවද සඳහන්  කරයි.

මේ අතර ඉන්ධන බෙදා හැරීමේ අවශ්‍යතාවලින් සියයට අසූවක්ම පෞද්ගලික බවුසර් යොදාගෙන සම්පූර්ණ කර තිබූ හෙයින් සමාගමට අයත් බවුසර වලින් සියයට 75 කට වැඩි ප්‍රමාණයක් එනම් සමස්ත බවුසර් ධාරිතාවෙන් සියයට පනහක්ම අක්‍රියව පැවතුණු  බවවිගණන නිලධාරීහු පෙන්වා දෙති.

ඉන්ධන බෙදා හැරීමේ කටයුතු සඳහා අරමුදල් ආර්ථිකමය වශයෙන් හා කාර්යක්ෂමව යෙදවීමට නම් සමාගමට හිමි බවුසර් ප්‍රශස්ත ලෙස භාවිතා කිරීමට ප්‍රමුඛත්වය දිය යුතු බව විගණන නිලධාරීහු නිර්දේශ කර ඇත

මේ තොරතුරු සඳහන් වන්නේ ලංකා ඛනිජ තෙල් තොග ගබඩා පර්යන්ත සමාගමේ 2021 වාර්තාවට ඇතුළත් කරනු ලැබ ඇති විගණන වාර්තාවේය.