කොරෝනා වයිරසයෙන් බැට කන රටවලට ඇමෙරිකානු ඩොලර් බිලියන 12ක කඩිනම් ආධාර පැකේජයක් ලබාදෙන බව ලෝක බැංකුව නිවේදනය කරයි.

 

චීනයේ හුබෙයි පළාතේ වූහාන් නගරයෙන් ව්‍යාප්ත වීමට පටන් ගත් කෝවිඩ්-19 යනුවෙන් හැඳින්වෙන නව කොරෝනා වයිරසය මේ වනවිට රටවල් 70කට වැඩි සංඛ්‍යාවකට ව්‍යාප්ත වී තිබේග ඉන් වැඩිම බලපෑමක් එල්ල වී ඇත්තේ චීනය, දකුණු කොරියාව, ඉතාලිය, ඉරානය සහ ජපානය යන රටවලටය.

 

‘‘අපේ අරමුණ අවශ්‍ය රටවලට කොරෝනා වයිරසය මැඬීම සඳහා වේගවත් සහ ඵලදායී පියවර ගැනීමටත් ඉක්මනින් ප්‍රතිචාර දැක්වීමටත් සහයෝගය දැක්වීම’’ යැයි ලෝක බැංකුවේ සභාපති ඩේවිඩ් මැල්පාස් පැවැසීය.

 

‘‘දුප්පත් පෙළෙන රටවලට කොරෝනා තවත් අමතර බරක්. අපි එය හඳුනාගන්න ඕනෑ. කෝවිඩ්-19 ව්‍යාප්ත වීම වැළැක්වීමට අඩුම හැකියාවක් තිබෙන්නේ එම රටවලට. ඒ නිසා ඔවුන්ගේ තත්ත්වය හඳුනාගැනීම ඉතාම වැදගත්’’ යැයි හෙතෙම කීය.

 

ලොව දුප්පත්ම රටවල් ඉලක්ක කරගනිමින් ලෝක බැංකුව මෙම ආධාර පැකේජය නිවේදනය කර ඇත. එම ආධාර මුදල් වෛද්‍ය උපකරණ මිලදී ගැනීම හෝ සෞඛ්‍ය සේවා සඳහා මෙන්ම විශේෂඥ සහ ප්‍රතිපත්ති සහාය ලබාගැනීම සඳහා යොදාගත හැකි යැයි ද ලෝක බැංකුව සිය නිවේදනය සඳහන් කර ඇත.

 

ඒ.එෆ්.පී.

055