(අංජුල මහික වීරරත්න)

කිරිගව සොරකම්වලට දඩය රුපියල් මිලියනය දක්වා ඉහල නංවා සත්ව සුබ සාධක පනත සංශෝධනය කරන ලෙස කෘෂිකර්ම අමාත්‍ය මහින්ද අමරවීර මහතා  උපදෙස් දුන්නේය.

කිරි ගවයින්  සොරකම් කිරීම් මේ  වනවිට දිවයින පුරා ඉහළ යමින් පවතින බවට වාර්තා වී ඇතැයි  කෘෂිකර්ම අමාත්‍යාංශය පවසයි. 

දැනට ක්‍රියාත්මක සත්ව සුබසාධන පනත යටතේ කිරිගව සොරකම් සඳහා උපරිම දඩය රුපියල් 50,000ක් වන අතර ඒ වරද සදහා සිර දඩුවම් පැනවීමක් ගැන සඳහන් නොවන බව අමාත්‍යාංශය කියයි.

මෙම කාරණය සැලකිල්ලට ගනිමින් කිරිගව සොරකම් සඳහා වන දඩය රුපියල් ලක්ෂ 10 දක්වාත්, අඩුම තරමින් වසරක බරපතල වැඩ සහිත සිර දඩුවම් පැනවීම සඳහාත් වගන්ති ඇතුලත් කර සත්ව සුබසාධන පනත සංශෝධනය කරන්නැයි කෘෂිකර්ම අමාත්‍ය   මහින්ද අමරවීර මහතා පශු සම්පත් සංවර්ධන අංශයේ නිලධාරීන්ට උපදෙස් දුන්නේය.