(අංජුල මහික වීරරත්න සහ සුජිත් හේවාජුලිගේ)

යෝජිත කම්කරු නීති ප්‍රතිසංස්කරණය යටතේ ප්‍රධාන පනත් කෙටුම්පත් හතරක් හඳුන්වා දීම පිළිබඳව සලකා බලමින් සිටින බව  කම්කරු අමාත්‍ය ආචාර්ය අනිල් ජයන්ත ප්‍රනාන්දු මහතා ප්‍රකාශ කළේය.

කම්කරු කටයුතු පිළිබඳ අමාත්‍යාංශයීය උපදේශක කාරක සභාව  පාර්ලිමේන්තුවේ දී රැස්වූ අවස්ථාවේදී අමාත්‍යවරයා මේ බව කීය.

මෙහිදී අදහස් දක්වමින් කම්කරු  අමාත්‍යාංශයේ ලේකම්වරයා කීවේ දැනට භාවිතයේ පවතින කම්කරු නීති 14ක අධ්‍යයනය කිරීම සඳහා සාමාජිකයින් 17 දෙනෙකුගෙන් යුත් කමිටුවක් පත් කර ඇති බවයි. 

මෙම කමිටුව ප්‍රථමයෙන් රැස්වී ප්‍රධාන වශයෙන් ශ්‍රමයට අදාළ පනත් කෙටුම්පත් හතරක් සකස් කිරීම සඳහා මූලික එකඟතාවයකට පැමිණි බව ද ඔහු පැවසුවේය.

වෘත්තීය සමිති, ශ්‍රමය, වෘත්තීය ආරක්ෂාව සහ ශ්‍රමයෙන් ඉවත් වීම යන කරුණු හතරක් සඳහා වෙනම පනත් කෙටුම්පත් සකස් කිරීමට කමිටුව එකඟතාවයකට පැමිණ ඇති බවත් නව නීති සම්පාදනය කරන තෙක් පවතින නීති වලට අවශ්‍ය සංශෝධන සිදු කරන බවත් අමාත්‍යාංශ ලේකම්වරයා වැඩි දුරටත් අදහස් දක්වමින් සඳහන් කළේය.