ගවේශනාත්මක මාධ්‍යවේදීන්ගේ ජාත්‍යන්තර සංසදය හෙළි කළ පැනමා පත්‍රිකාවල සඳහන් ලංකාවේ පුද්ගලයන්ගේ ලිපිනවලට ලියුම් යවා නිදහසට කරුණු විමසන බවත්, දින 14ක් ඇතුළත පිළිතුරු නොලැබුණහොත් හෝ සාධාරණ පිළිතුරක් නොලැබුණහොත් මූල්‍ය අපරාධ විමර්ශන කොට්ඨාසය මගින් ඔවුනට විරුද්ධව කටයුතු කරන බවත් මුදල් ඇමැති රවී කරුණානායක මහතා කියයි.

මුදල් අමාත්‍යංශය සහ මහ බැංකුව එක්ව මේ ගැන සෙවීමට කමිටුවක් පත් කර ඇති බව ද ඔහු පවසයි.

කරුණානායක මහතා මේ බව කීවේ මාධ්‍යවේදීන් සමග අදහස් දක්වමිනි.

මේ අතර අද පැවැති කැබිනට් තීරණ දැනුම් දීමේ මාධ්‍ය හමුවේදී මහා නගර සංවර්ධන ඇමැති පාඨලී චම්පික රණවක මහතා කීවේ මහින්ද රාජපක්ෂ මහතා රට පාලනය කළ දශකයේදී ඩොලර් බිලියන 20ක් (රුපියල් කෝටි 2000)  පමණ රටින් පිට කර ඇති බවයි.

එයින් වැඩිම ප්‍රමාණයක් වාර්තාවී ඇත්තේ 2011 වසරේ බවත් එය ඩොලර් බිලියන 4.6ක් (රුපියල් කෝටි 466) බවට ගණන් බලා ඇති බවත් රණවක මහතා කීවේය.

ටියුනීසියාවේ බෙන් අලි රටින් පැන්නූ වත්කම්වලින් මේ වන විට සොයා ගෙන ඇත්තේ සියයට එකක් පමණ බවත්, රටින් පැන්නූ වත්කම් සොයා ගැනීම ලේසි පහසු නොවන බවත් රණවක මහතා පැවසීය.