වසරක් තුළදී කටාර් ජනගහණය සියයට 7.7කින් ඉහළගොස් පසුගිය අප්‍රේල් මාසයේදී මිලියන 2.52 සීමාවට ළඟාවී තිබේ. පසුගිය මාර්තු මාසයේ දී කටාර් හි ජනගහණය මිලියන 2.34ක් වූ බවද සංවර්ධන සැලසුම් සහ සංඛ්‍යාලේඛන අමාත්‍යාංශය විසින් නිකුත් කළ වාර්තාවක දැක්වේ.

කෙසේ වෙතත්, ජනගහණය පසුගිය පෙබරවාරි මාසය සහ සසඳන විට ජනගහණයේ සුළු අඩුවීමක් දකින්නට ලැබෙන අතර ඒ මාසයේ දී කටාර් ජනගහණය මිලියන 2.54කි.

පසුගිය මාසයේ දී රටේ ජනගහණයෙන් මිලියන 1.91ක් පිරිමි වූ අතර එය පසුගිය මාර්තු මාසය හා සංසන්දනය කරන විට සියයට 8.7ක වැඩිවීමකි. පසුගිය වසරේ රටේ ගැහැණු ජනගහණය 609,055 දක්වා සියයට 4.6කින් වර්ධනය වී ඇත.

අමාත්‍යාංශයේ මාසික වාර්තාවෙන් ක්ෂේත්‍ර කිහිපයක් ආවරණය වී ඇති අතර රථ වාහන නීතිරීති උල්ලංඝනය කිරීම් වසරින් වසර සියයට 18.4කින් පමණ පහළ බැස ඇති බවද එම වාර්තාවේ දැක්වේ.

පසුගිය වසරේ මාර්තු මාසයේ දී රථවාහන උල්ලංඝනය කිරීම් 155,584ක් වාර්තා වී ඇති අතර එය පසුගිය මාසයේ දී 126,948 දක්වා පහළබැස ඇත. එසේම එය පෙබරවාරි මාසයේදී වාර්තා වූ උල්ලංඝනය කිරීම් 142,031ට සාපේක්ෂව සියයට 10.6ක පහළබැසීමක් බවද ඉහත වාර්තාවේ සඳහන් වෙයි.
රේඩාර් මගින් අල්ලාගන්නා රථවාහන වැරැදි සංඛ්‍යාව පසුගිය වසරේ මාර්තු මාසයේ දී 97,175ක් වූ අතර එය පසුගිය මාසයේ දී 69,917 දක්වා සියයට 28කින් පහළ බැස ඇත. පසුගිය පෙබරවාරියේ දී මෙම වැරැදි සංඛ්‍යාව 96,503ක් දක්වා සියයට 27.5කින් පහළබැස තිබුණි.

රතු ආලෝක සංඥා නොතකා ධාවනය කිරීම පසුගිය වසරේ මාර්තු මාසයේ දී 3,156ක් වූ අතර එය පසුගිය මාසයේදී 1,738ක් දක්වා සියයට 44.9කින් පහළ බැස තිබුණි. මෙම වසරේ පෙබරවාරියේ දී එවැනි වැරැදි 2,179ක් වාර්තා වුණි.

අලුතින් ලියාපදිංචි කරන වාහන සංඛ්‍යාව පසුගිය වසරේ මාර්තු මාසයේ දී 11,368ක් වූ අතර එය මෙම වසරේ අප්‍රේල් මාසය වනවිට වාහන 9,419ක් දක්වා සියයට 17.1කින් පහළබැස තිබුණි.

කෙසේ වෙතත්, එය පසුගිය පෙබරවාරියට සාපේක්ෂව පසුගිය මාසයේ දී සියයට 14කින් ඉහළගොස් තිබුණි. පෙබරවාරියේදී අලුතින් ලියාපදිංචි කර ඇති වාහන සංඛ්‍යාව 8,259කි. 

එසේම රටේ රියැදුරු බලපත්‍ර නිකුත් කිරීම පසුගිය පෙබරවාරියට සාපේක්ෂව අප්‍රේල් මාසයේ දී 8,633 සිට 9,889 දක්වා ඉහළගොස් ඇත.