2016 වසර නිමාවීමට ඇත්තේ තවත් මාස කිහිපයකි. නමුත්, මෙම වසර තුළ චිත්‍රපට බොහෝසෙයින් එළිදැක්වීමට නියමිතව ඇත. ඔක්තෝබර් මාසයේදී බොලිවුඩයේ පමණක් චිත්‍රපට 10ක් එළිදැක්වීමට නියමිතව ඇත. ඒ අතරින් චිත්‍රපට තුනක නවක නිළියෝ ප්‍රධාන චරිත සඳහා දායක වෙති. අප මෙවර කතාබහ කිරීමට යොමුවන්නේ ඔක්තෝම්බර් මාසයේ බොලිවුඩයට පායන නවක තරු ගැනයි.

Saiyami Kher

ඇය නිරූපිකාවක ලෙස ක්ෂේත්‍රයට ප්‍රවිෂ්ට වූවාය. ලෝක ප්‍රසිද්ධ වෙළෙඳ නාම වූ "Levis", "Pantaloons", "L'oreal" ආදියෙහි ප්‍රධාන නිරූපිකාව ලෙස කටයුතු කරනු ලැබූ අතර, "Kingfisher" දින දර්ශකයේ නිරූපිකාවක ලෙස කටයුතු කිරීමට අවස්ථාව උදාකර ගනු ලැබීය. ඉන්පසු 2015 වර්ෂයේදී තිරගත වූ "Rey" නම් තෙලිඟු චිත්‍රපටය ඇගේ පළමු චිත්‍රපටය විය. ඇය රංගනයෙන් දායක වූ දෙවැනි චිත්‍රපටය වන්නේ "Mirzya" චිත්‍රපටයයි. එය පසුගිය 07දා එළිදක්වනු ලැබීය. එම චිත්‍රපටය අධ්‍යක්ෂණය කරනු ලැබුවේ රාකේෂ් ඕම්ප්‍රකාශ් මෙහෙරා විසින් වන අතර, එහි නිෂ්පාදනය රෝහිත් කත්තාර් විසින් සිදුකරනු ලැබීය. මෙම චිත්‍රපටයේ ඇයත් සමග ප්‍රධාන චරිතයට පණ පොවනු ලබන්නේ හර්ෂ්වර්ධන් කපූර්ය. මෙම චිත්‍රපට නිෂ්පාදනය සඳහා ඉන්දියානු කෝටි 35ක විදයමක් දරා ඇති බව සඳහන් වෙයි.

Sayyeshaa Saigal

මැය රංගන ශිල්පි සුමීත් සයිගල්ගේ දියණිය වන අතර, ඒ නිසා ඇය රංගන පවුලකට නෑකම්ද කියයි. 2015 වර්ෂයේදී තිරගත වූ "Akhil" තෙලිඟු චිත්‍රපටය ඇයගේ පළමු සිනමා නිර්මාණය වෙයි. 2016 වර්ෂයේදී අජේ දේව්ගන් සමග රංගනයෙන් දායකවන ඇයගේ දෙවැනි චිත්‍රපටය වන්නේ "Shivaay" චිත්‍රපටයයි. එය ඔක්තෝබර් 28 වැනිදා එළිදැක්වීමට නියමිතව ඇත. මෙම චිත්‍රපටයේ අධ්‍යක්ෂකවරයා සේම නිෂ්පාදකවරයාද වන්නේ අජේ දේව්ගන්ය. ඊට අමතරව ප්‍රධාන නළුවාද වන්නේ ඔහුය. 2017 දී ඇය "Kumari Kandam" නම් දමිළ චිත්‍රපටය සඳහා රංගනයෙන් දායක වීමට නියමිතය.

Swati Kapoor

නිරූපණ ශිල්පිනී සහ රංගන ශිල්පිනිය 2008 වර්ෂයේදී ඇය ක්ෂේත්‍රයට පිවිසුණු අතර, ඇයගේ පළමු නිර්මාණය වූයේ 2008 වර්ෂයේදී විකාශනය වූ "Kaali – Ek Agnipariksha" නම් රූපවාහිනි ටෙලි නාට්‍යයේ අතුරු චරිතයක් සඳහා දායක වීමෙනි. 2014 වර්ෂයේදී තිරගත වූ Mr Mrs 420 චිත්‍රපටය ඇයගේ පළමු සිනමා නිර්මාණය විය. ඉන්පසු 2015 වර්ෂයේදී "Mere Genie Uncle" චිත්‍රපටය සඳහා රංගනයෙන් දායක වූ අතර, 2016 වර්ෂයේදී "Fuddu" ලෙස නම්කර ඇති චිත්‍රපටයක් එළිදැක්වීමට නියමිතව තිබේ.