ශ්‍රී ලංකාවේ ප්‍රකට නාරිවේද වෛද්‍යවරයකු වූ අභාවප්‍රාප්ත වෛද්‍ය ශිවා සින්නතම්බි කොළඹ සරසවියට පරිත්‍යාග කළ කොළඹ හතේ නිවසේ තිබූ රුපියල් කෝටි 15ක භාණ්ඩ සොරකම් කළැයි කියන නඩු වාර්තාවේ ලියවිල්ලක් ඉවත් කරන ලෙස කොළඹ ප්‍රධාන මහේස්ත්‍රාත් ගිහාන් පිලපිටිය අද නියෝග කළේය.

වෙබ් අඩවිවලින් ලබා ගත් බව කියන වාර්තා කිහිපයක් අඩංගු ලියවිල්ලක් අගතියට පත් පාර්ශවයේ නීතිඥවරයකු විසින් ඊට පෙර උසාවියට ඉදිරිපත් කර ඇති බවත් එම ලියවිලි නඩු ගොනුවට එකතුකර ඇති බවත් හිටපු උසස් අධ්‍යාපන ඇමතිවරයකු වන එස්.බී.දිසානායක ගැන පලකර ඇතැයි කියන එම ලියැවිලි මෙසේ ඉවත් කැරිණි.

දිසානායක මහතා වෙනුවෙන් පෙනී සිටි නීතිඥ කේ.වී.තවරාසා මහතා පැවසුවේ දිසානායක මහතාගේ කීර්ති නාමය පළුදු කිරීමට මාධ්‍ය මගින් කට කතා පැතිරවීමේ උත්සාහයක් ඇති බවයි. අගතියට පත් පාර්ශවයේ නීතිඥවරයා අද උසාවියට පැමිණ සිටියේ නැත.

දොස්තර සින්නතම්බිගේ බෑණාගේ අභාවයෙන් පසු කුරුඳුවත්ත පොලිසිය එම නිවසට මුද්‍රා තබද්දී රුපියල් කෝටි 15ක් පමණ වටිනා පෞරාණික වටිනාකමක් සහිත බඩු මුට්ටු එහි තිබූ බව පොලිසිය අධිකරණයට දැනුම් දී ඇත.

බඩු භාණ්ඩ සොරකම් කර ඇතැයි කියනුයේ එම නිවස පොලිසිය භාරයේ පවතින කාලයේ දී බව ද අධිකරණයේ දී සඳහන් විය. වැඩිදර විභාගය ලබන පෙරවාරි 03ට කල් තැබිණි.