බණ්ඩාරවෙල නගරයට ආසන්න මහඋල්පත සහ දකුණු කැබිල්ලවෙල ග්‍රාමසේවා වසම්වලට අයතත් මහඋල්පාවත්ත නායබැද්දවත්ත අතර ඉඩමක ඌව පළාතේ සරල ගුවන්තොටුපළක් ඉදිකිරීමට තීරණය කර ඇතැයි ප්‍රවාහන හා සිවිල් ගුවන්සේවා අමාත්‍ය නිමල් සිරිපාල ද සිල්වා මහතා අද (25) බදුල්ලේ දී පැවසීය.

මීට පෙර ගුවන්තොටුපළක් ඉදිකිරීම සඳහා හපුතලේ තොටලාගලවත්ත ප්‍රදේශය නිරීක්ෂණය කළද එහි නායයාමේ අවදානම හා අධිබලැති 33000 විදුලි කණු ඉවත් කිරීමේ අපහසුතාවය සැලකිල්ලට ගෙන එම අදහස වෙනස් කළ බවද ඇමැතිවරයා කීය.

ඉදිකිරීමට යෝජිත ගුවන්තොටුපළ සඳහා ධාවන පථය මීටර් 1300ක් පමණ දිග බවත් එය බණ්ඩාරවෙල - කොස්ලන්ද මාර්ගයේ සිට කිලෝමීටර් 3.5ක දුරක පිහිටි ඉඩමක ඉදිකිරීමට යන බවත් මෙහි මගීන් 48කට යෑමට හැකි ගුවන් යානා ගොඩ බැස්සවීම හා පිටත්වීම සිදුකළ හැකි බවත් එම ගුවන්තොටේ සිට විනාඩි 30ක් ඇතුළත ලංකාවේ ඕනෑම ස්ථානයකට ගමන් කළ හැකි බවත් ඇමැතිවරයා කීවේය.

අදාළ වාර්තා හා ඇස්තමේන්තු ලබාගෙන මේ වසරේදී ගුවන්තොටුපළ ඉදිකිරීමේ කටයුතු ආරම්භ කිරීමට නියමිත බවද ඔහු පැවසීය.