උතුරු නැගෙනහිර දෙමළ ජනතාවගේ දේශපාලන ඉල්ලීම් දිනාගැනීම සදහා වතුකරයේ ජනතාවගේ සහාය නොමදව හිමිවන බව අධ්‍යාපන රාජ්‍ය අමාත්‍ය වී රාධාක‍්‍රිෂ්ණන් මහතා පැවසීය

එමෙන්ම යුද්ධයෙන් අවතැන්වූ උතුරේ ජනතාවගේ දේශපාලන විසඳුමක් වෙනුවෙන් යෝජිත ආණ්ඩුක‍්‍රම ව්‍යවස්ථා සංශෝධනය සකස් වනු ඇති බවද ඒ මහතා සදහන් කළේය

කොකුවිල් හින්දු විදුහලේ 09 වනදා පැවති උත්සවයකට එක්වෙමින් අමාත්‍යවරයා මේ අදහස් පලකර තිබුණු අතර එහිදී ඒ මහතා මෙසේද කීවේය.

“දින දහයක් පුරා වතුකම්කරුවන්ගේ වැටුප රුපියල් දහසක් දක්වා වැඩි කරන්න කියලා දැවැන්ත විරෝධතාවක නිරත වෙනවා.වතුකම්කරුවන්ගේ එම විරෝධතාවයට සහාය පලකර  උතුරෙත් විරෝධතා සිදුවුණා.උතුරෙන් හඬක් නැගුණා.ඒ ගැන මා සතුටු වෙනවා.අප උතුරු නැගෙනහිර පළාත්වලින් පාර්ලිමේන්තුවට පත්වූ මන්තී‍්‍රවරුන් සමගින් එකතු වෙලා අප සැමගේම ඉල්ලීම් සදහා බලකර යුතුයි.

පූර්ණ ලෙස බලතල විමධ්‍යගත කිරීමක් අවශ්‍යයි කියල උතුරේ දෙමළ ජනතාව අරගල කර සිටින මොහොතක මෙම ජනතාවගේ දේශපාලන බලාපොරොත්තු ඉටුවන ආකාරයේ දේශපාලන විසඳුමක් උතුරු නැගෙනහිර පළාත්වලට ලබාදිය යුතුයි.ඒ වෙනුවෙන් වතුකරයේ ජනතාවගේ පූර්ණ සහාය හිමිවෙනවා.අපි වතුකරයේ සිටියත් උතුරු නැගෙනහිර වතුකරය කියලා වෙනස් විදිහට සලකන්නෙ නැහැ.සෑම පළාතකටම සමාන සැලකිල්ලක්මයි දක්වන්නේ.“