මම සම්ප්‍රදායික කාන්තාවක් නෙමෙයි. ඉතින් ඒක නිසා සම්ප්‍රදායික කාන්තාවන් බොහෝ දෙනකුට හිතෙන දේවල් මට හිතෙන්නේ නෑ අනික කවුද කියන්නේ විවාහ වෙලා දරැවො හදාගෙන නිස්කලංකව ඉන්න පුළුවන් කියලා.

 තනූජා ඉස්සර තරම් ඔබ දැන් පේන්න නෑ නේද?
ඔව්. ඇත්තටම මට මගේ වෘත්තීය ජීවිතය නිවේදිකාවක් විදිහටම අවසන් කරන්න වුවමනාවක් නෑ. ඊට වඩා දේවල් කරන්නට මට කැමැත්තක් තියෙනවා. ටෙලිවිෂන් එකේ හැමවෙලේම පෙනෙන එක නෙමෙයිනෙ ලයිෆ් එක කියන්නේ. හැබැයි රූ දොළහට හදිසි ප්‍රෝගෑම් එකකට කතාකරලා එන්න කිව්වත් මම එනවා.

 මේ දවස්වල මොනවද කරන්නේ?
මම මහාරාජා ආයතනයේ ඉහළ කළමනාකාරීත්වය නියෝජනය කරමින් ප්‍රවර්ධන හා ප්‍රචාරණ අධ්‍යක්‍ෂිකාව විදිහට වැඩ කරනවා සිරස TV, සිරස FM, ශක්ති TV, ශක්ති FM, Y FM කියන සියලුම නාලිකාවල.

 ඒ කියන්නේ ඔබ දැන් කළමනාකාරීත්වයට යොමුවෙලා?
ඔව්. අර කතාවක් තියෙනවානෙ තමන් අවුරැදු දහයකට කලින් හිටිය තැනම නම් තවත් ඉන්නේ තමන්ගේ වෘත්තීය ඇතුළෙ මුකුත්ම කරගෙන නෑ කියලා. ඉතින් මට එහෙම එකම තැනක ඉන්න ඕන වුණේ නෑ.

 රසරිසි ගීත් එක්ක තනූජා - නාරද බෙහෙවින්ම ජනප්‍රිය වෙච්ච යුගයක් තිබුණා. එදා තිබ්බ ජනප්‍රියත්වයත් දැන් අඩුවෙලා නැද්ද ඔයාට?
මම හිතන්නේ නෑ. ඇත්තටම ජනප්‍රියත්වය කියන්නේ හරියට සමනලයෙක් වගෙයි. අද මගේ ඇඟේ වහන්න පුළුවන්. හෙට තවත් කෙනෙක්ගෙ ඇඟේ වහන්න පුළුවන්. මගේ පැත්තෙන් ගත්තොත් මම පාරතොටේ යද්දි එදා වගේම අදත් මිනිස්සු මාත් එක්ක කතා කරනවා. ෆොටෝස් ගන්නවා. මගේ ඔටෝග්‍රාෆ් ගන්නවා. රසරිසි ගී ගැන කතාකරනවා. ඉතින් මේ හැමදෙයක්ම එක්ක ජනප්‍රියතාවයේ අඩුවක් තියෙනවා කියලා මට තාම දැනිලා නෑ. දැන් අපි ඉන්නෙ Online සමාජයක් ඇතුළේ ඒ නිසා හැමෝම ජනප්‍රියයි.

 අලුතෙන් හදපු බොල්ගොඩ ගෙදරද දැන් පදිංචිය?
මම තාම එහෙ ගියේ නෑ. මොකද මගේ රුකියාවේ කාර්යබහුලතාවයත් එක්ක වැඩිහරියක්ම ගත කරන්න වෙන්නේ කොළඹ. ඉතින් එහෙ ඉඳන් යන්න එන්න අමාරැයි. නමුත් වීක්එන්ඩ්ස්වලට එහෙම ගිහින් ඉඳලා එනවා.

 ඇත්තටම ඇයි කසාදයක් ගැන හිතන් නැත්තේ? Boyfriend කෙනෙක් නැද්ද? හැමදාම තනියෙන් ඉන්නද කල්පනාව?
මගෙ ජීවිතේ විවාහය කියන එක ලොකුම දේ නෙමෙයි. මම තමයි මගෙ ජීවිතේ තියෙන ලොකුම දේ.
ගෙදර ජීවිතේ කොහොමද ගෙවෙන්නේ.
අම්මයි තාත්තයි මට කරදරයක් නැතිව ජීවත් වෙනවා. මම නම් තාමත් අම්මටයි තාත්තටයි කරදර කරමින් ජීවත් වෙනවා
 

 ඔබට ගෙදර කිසිම වගකීමක් නැද්ද?
මම ගෙදර ඉන්න වෙලාව හරිම අඩුයි. ඉරිදට නම් අම්මත් එක්ක දෙල්කඳ පොළට යනවා බඩු ගේන්න. ඊට අමතරව අක්කලගෙ බබාලට හරි අම්මලට හරි බෙහෙත් ගන්න එහෙම වුවමණාවක් තිබුණොත් ඒ දේවල්වලට අනිවාර්යයෙන්ම යනවා. හැබැයි මම උයන්නෙ පිහන්නෙ නම් නෑ.

 ඒ කියන්නේ තනූජට උයන්න බෑ කියන එකද?
මෙහෙමයි මට හැකියාවත් තියෙනවාද කියලා මම තාම උරගා බලලා නෑ. මොකද හැමෝම මාව හුරතල් කරලනෙ හදලා තියෙන්නෙ. අම්මත් එහෙමයි. අක්කලත් එහෙමයි. මගේ යාළුවන්ගේ ගෙවල්වල ගියහම වුණත් ඒගොල්ලො ආදරෙන් මාව බලාගන්නවා මිසක් කිසිම දෙයක් මට කරන්න දෙන්නේ නෑ.

 නිවේදන ජීවිතේ ඇති කියලා හිතෙන්නෙ නැද්ද?
සමහර දේවල් තියෙනවා කාලය හා අප ලබාගන්නා අත්දැකීම් එක්ක වෙනස් විය යුතුයි. ඉතින් ඒක නිසා ඉස්සරහට මාව දකින්න ලැබෙන්නේ විශේෂ වැඩසටහන්වල විතරයි. 

 විවාහවෙලා දරැවෝ හදාගෙන නිස්කලංකව ඉන්න හිතෙන්නෙ එහෙම නැද්ද?
මම සම්ප්‍රදායික කාන්තාවක් නෙමෙයි. ඉතින් ඒක නිසා සම්ප්‍රදායික කාන්තාවන් බොහෝ දෙනකුට හිතෙන දේවල් මට හිතෙන්නේ නෑ අනික කවුද කියන්නේ විවාහ වෙලා දරැවො හදාගෙන
නිස්කලංකව ඉන්න පුළුවන් කියලා. සම්ප්‍රදායික කාන්තාවක් වුණානම් මම මෙතෙන්ට එන්නේ නැහැනෙ. බැඳලා ළමයිනුත් හදාගෙන ගෙදරට වෙලා ඉඳීවි.

 ඔබ කැමතිම වෙනත් නිවේදිකාවක් හෝ නිවේදකයෙක් ඉන්නවද?
ප්‍රේමකීර්ති ද අල්විස්, චේතනා ලියනගේ, කිංස්ලි රත්නායක, කැලුම් ශ්‍රීමාල් නාරද බක්මීවැව මේ හැමෝටම මම කැමතියි.

 ඔබ විසින් අනුකරණය කළ නිවේදකයෝ හෝ නිවේදිකාවෝ හිටියද?
නෑ. මම ඔරිජිනල් මම විදිහටම තමයි ක්‍ෂේත්‍රයට ආවේ. කාවහරි අනුකරණය කරන්න ගියානම් මට මම විදිහට ඉන්න බැහැනෙ. කෝටි දෙකක් පමණ මිනිසුන් ජීවත්වෙන රටක නම කියූ පමණින් හඳුනාගන්නට නම් මොකක් හරි වෙනසක් තියෙන්න ඕනෙ. ඉතින් ඒකට තව කෙනෙක් වගේ ඉඳලා හරියන්නේ නැහැනෙ. 

 ඔබ විටෙක කියලා තිබුණා කැමරාව සමඟ කරන ගනුදෙනුව පෙම්වතකු හා කරන ගනුදෙනුවට සමානයි කියලා. ඔබේ ඉදිරිපත් කිරීම මේ තරම් ආකර්ෂණීය ඒ නිසාද?
මගේ ගුරැවරැ කියලා දුන්න දෙයක් තමයි කැමරාවට බොරැ කරන්න එපා කියන එක. ඉතින් අපි හරියට ආදරේ කරනවා නම් ආදරවන්තයාටත් බොරැකරන්න බැහැනෙ. කැමරාව කියන දේ කවදාවත් මට උපකරණයක් විදිහට දැනිලා නෑ. මට හිතෙන්නේ ඒකට පණ තියෙනවා කියලයි. ඉතින් ඒ නිසා මම ගොඩක් ආදරේ කරන චරිතයක් දිහා බලනවා වගේ තමයි කැමරාව දිහා බලන්නේ.

 කැමරාවට ඉදිරියට ගියාම කවදාවත් බය හිතිලා නැද්ද?
ඕනෑම කෙනකුට පළමුව තත්පර තිහ පමණ ගතවෙනකන් පොඩි ගැස්මක් තියෙනවා. මම වුණත් අදටත් එහෙමයි. ඊට පස්සේ ගොඩක් රිලැක්ස් වෙනවා. මගේ රෑපය, කටහඬ, දක්‍ෂතාවය මේ හැමදෙයක්ම මිනිස්සු අතරට අරන් ගියේ කැමරාව. ඇත්තටම මම ජීවිතේ ලබාගත්ත හැම දෙයක්ම ලැබුණේ මේ හරහා කියලා මම විශ්වාස කරනවා.

 - කුමී - / සේයාරෑ - රොමේෂ් ධනුෂ්ක සිල්වා