(ඩයනා උදයංගනී)

         

වත්මන් රජය බලයට පත්වීමෙන් පසු රටේ බිම් අඟලක් හෝ විදේශීකයින්ට සින්නක්කරව ලබාදී ඇත්නම් ඒ බව ඔප්පු කරන්නැයි තමන් රාජපක්‍ෂවරුන්ට අභියෝගය කරන බව ජාතික හෙළ උරුමයේ මහලේකම්, මහනගර හා බස්නාහිර සංවර්ධන අමාත්‍ය පාඨලී චම්පික රණවක මහතා පැවසීය.

නමුත් මහින්ද රාජපක්‍ෂ මහතාගේ රජය යුද හමුදා මූලස්ථානයට අයත්ව තිබූ අක්කර 10ක භූමියක් ෂැංග‍්‍රිලා සමාගමට රුපියල් මිලියන 8,250ක මුදලකට ලබාදුන්නේ සින්නක්කරව බව ද ඇමැතිවරයා සඳහන් කළේය.

එමෙන්ම මිලේනියම් චැලේන්ජ් කෝපරේෂන් ගිවිසුමට විරුද්ධ නම් එය තමන්ගේ රජයක් යටතේ ඉවත් කරන ලෙස ප‍්‍රසිද්ධියේ ප‍්‍රකාශ කරන්නැයි ද තමන් රාජපක්‍ෂවරුන්ට අභියෝග කරන බව පාඨලී චම්පික මහතා කීවේය.

මෙම කරුණු සම්බන්ධයෙන් ශ්‍රී ලංකා පොදුජන පෙරමුණ නැමති සමාගමේ අධ්‍යක්‍ෂවරුන් වන රාජපක්‍ෂවරුන් සමඟ ප‍්‍රසිද්ධ විවාදයකට සූදානම් බව කී ඇමැතිවරයා රාජපක්‍ෂවරුන් සමඟ මිස එම කණ්ඩායමේ අලෙවි නියෝජිතයින් වන සෙසු මන්ත‍්‍රීවරුන් සමඟ විවාද කිරීමට තම පාර්ශවය සූදානම් නැතැයි ද කීවේය.

ඇමැතිවරයා මේ බව පැවසුවේ පිටකෝට්ටේ පිහිටි සෝලීස් උත්සව ශාලාවේදී අද (11) පැවති මාධ්‍ය හමුවක් අමතමිනි.