(අංජුල මහික වීරරත්න සහ සුජිත් හේවාජුලිගේ)

"අස්වැසුම" සමාජ ආරක්ෂණ වැඩසටහනට සුදුසුකම් ලත් පිරිස තෝරාගැනීමේදී යාවත්කාලීන වූ  නිවැරදි දත්ත පද්ධතියක් අවශ්‍ය බව   ලෝක බැංකු නියෝජිතයෝ මුදල්, ක්‍රම සම්පාදන සහ ආර්ථික සංවර්ධන අමාත්‍යාංශයේ නිලධාරීන් සමඟ පාර්ලිමේන්තුවේදී පැවැති සාකච්ඡාවකදී පැවැසූහ.

 සමාජ ආරක්ෂණය සඳහා දත්ත පද්ධතියක් සකස් කිරීම ඔස්සේ  සැබෑ ලෙසම  දිළිඳු සහ අවදානම් මට්ටමේ සිටින  පිරිස් හා පවුල් හඳුනාගත හැකි බව මෙහිදී ලෝක බැංකු නියෝජිතයෝ කීහ.

සමාජ ආරක්ෂණ දත්ත පද්ධතියකට පුරවැසියන්ගේ තොරතුරු ඇතුළත් කළ  පමණින් ඔවුන් අස්වැසුම හෝ අදාළ වෙනත් ප්‍රතිලාභ ලබා ගැනීමට සුදුසුකම් ලත් පිරිසක් නොවන බවත්, එම ඇතුළත් කර ඇති දත්ත පරික්ෂා කර බලා අදාළ ප්‍රතිලාභ අවශ්‍ය පිරිස් නිවැරදිව හඳුනා ගත හැකි බව එම නියෝජිතයෝ කීහ. 

ලෝක බැංකුවේ සමාජ ආරක්ෂණ ව්‍යාපෘතිය ජ්‍යෙෂ්ඨ ආර්ථික විද්‍යාඥ ෆ්‍රැන්සෙස්කා ලමන්නා (Francesca Lamanna)ජ්‍යෙෂ්ඨ සමාජ ආරක්ෂණ විශේෂඥ  ශ්‍රීනිවාස් වරදන් (Srinivas Varadan)මහත්ම මහත්මීහු  ඇතුළු පිරිසක් මීට සහභාගී වූහ.