(සුජිත් හේවාජුලිගේ)

පරිසර අමාත්‍යාංශයේ සොබාදම් පියස ගොඩනැගිලි පරිශ්‍රයේ ඉදිකෙරුණු ජල පිරිපහදු පද්ධතියෙන් ජීව වායු නිෂ්පාදනය කර භාවිතා කිරීමට අපේක්ෂා කළත් වසර හතකදී එසේ එකතු කරගෙන තිබූ ජීව වායුව කිසිදු කටයුත්තකට යොදා නොගෙන වායුගෝලයට මුදා හැර තිබූ බව ජාතික විගණන කාර්යාලය නිකුත් කළ එහි අලුත්ම වාර්තාවේ සඳහන් වේ.

ජීව වායුව නිපදවීම සඳහා සකස් කෙරුණු මෙම අපජල පිරිපහදු පද්ධතිය සඳහා රුපියල් තිස් පන් ලක්ෂයකට ආසන්න මුදලක් වැය කර තිබූ බව ජාතික විගණන කාර්යාලය පවසයි.

මෙසේ වායුගෝලයට මුදා හැර ඇත්තේ මෙම අපජල පිරිපහදු පද්ධතියෙන් 2017 සැප්තැම්බර් 14 වැනිදා සිට මෙම වර්ෂයේ මාර්තු මස 23 වැනිදා දක්වා නිපදවා තිබූ ජීව වායුව බවද එම වාර්තාවේ දැක්වේ.

මෙම අප ජල පිරිපහදු පද්ධතියෙන් අදාල අරමුණු ඉටුකර ගැනීමට බලධාරීන් කටයුතු කර නොතිබූ බව වාර්තාවෙන් පෙන්වා දෙන විගණන කාර්යාලය සම්පත් ඵලදායී ලෙස උපයෝජනය කරන්නැයි පරිසර අමාත්‍යංශයට නිර්දේශයක්ද කර ඇත .

මේ සම්බන්ධයෙන් විගණන නිලධාරීන්ට කරුණු දක්වා ඇති පරිසර අමාත්‍යාංශයේ ප්‍රධානීන් සඳහන් කර ඇත්තේ ජීව වායු ඒකක සිට ආපන ශාලාව දක්වා ජීව වායුව රැගෙන ගොස් පරිහරණය කිරීම සඳහා අවශ්‍ය උපාංග සකස් කරන ලෙසට අදාළ අංශවලට උපදෙස් දී ඇති බවයි.

අමාත්‍යාංශ නිලධාරීන් හා සීඊසීබී ආයතනයේ නියෝජිතයන් අතර 2023 මැයි මස 17 වැනිදා පැවති සාකච්ඡාවකදී ගොඩනැගිල්ලේ නඩත්තු කටයුතු සම්බන්ධයෙන් එකඟතාව ප්‍රකාශ කර ඇති බවද එම ප්‍රධානීන් එහිදී වැඩිදුරටත් පෙන්වාදී ඇත.