(උපාලි ආනන්ද)

පන්දම් වලින් ගිනි තබා, ඇස්පෙනීමේ දුර්වල, පාදයට වෙඩි තැබීමෙන්  ඇවිදීමේ අපහසුතාවයකින් සිටි වන අලියකු පුළුස්සා මරා දැමී යැයි කියන   සිද්ධියක් සම්බන්ධයෙන්  අත්අඩංගුවට ගත් සැකකරුවන් තිදෙනා ලබන 24 දක්වා රිමාන්ඩ් බාරයේ තබන්නැයි අනුරාධපුර අතිරේක මහේස්ත්‍රාත් සඳුනි හපුආරච්චි මෙනවිය නියෝග කළාය.

මෙසේ රිමාන්ඩ් භාරයට පත් කළේ මිහින්තලේ පොලිස් වසමේ සීප්පුකුලම අඹගහවෙල හංදියේ පදිංචිකරුවන් වන ජේ.එම්. සිසිර සේනාධීර , ජේ.එම් ප්‍රසන්ත චලින්ද කුමාර සහ ජේ.එම්. වසන්ත විජය කුමාර යන සැකකරුවන්ය.

සැකකරුවන්  ඕනෑම ඇප කොන්දේසියක් මත මුදා හරින ලෙස සැකකරුවන් ඔවුන් වෙනුවෙන් පෙනී සිටි නීතිඥ කණ්ඩායම දැඩිව කළ ඉල්ලීම තරයේ ප්‍රතික්ෂේප කළ මහේස්තාත්වරිය පන්දම් වලින් පිලිස්සීමේ ෙ සිද්ධිය සම්බන්ධයෙන් තව දුරටත් විර්ශන මෙහෙයවා එම විමර්ශන වල ප්‍රගතිය දැක්වෙන වාර්තාවක් මීළඟ නඩු දිනයේදී අධිකරණය හමුවට ඉදිරිපත් කරන ලෙසද නියෝග කළාය. 

මෙම අපරාධයට සම්බන්ධයෙන් තවත් සැකකරුවන් විමර්ශන වලදී අනාවරණය වන්නේ නම් ඔවුන්ට වහාම අත්අඩංගුවට ගෙන අධිකරණයට ඉදිරිපත් කරන ලෙසටද නියෝග කළාය‍

සැකකරුවන් වෙනුවෙන් පෙනී සිටි නීතිඥ නලින් දිමුතු බණ්ඩාර මහතා ඇතුළු නීතිඥ කණ්ඩායම දීර්ඝව අධිකරණයට කරුණු දක්වමින් කියා සිටියේ තම සේවා දායකයන් මෙම අපරාධයට කිසිදු සම්බන්ධතාවයක් නොමැති බවයි.

විමර්ශනවලට තම සේවා දායකයින් කිසිදු බලපෑමක් සිදු නොකරන බවත් විමර්ශනවලට සහාය දක්වන බවත් කියා සිටි නීතිඥයන් ඒ අනුව තම සේවා දායකයන් ඕනෑම ඇප කොන්දේසියක් මත මුදා හරින ලෙසද අයැද සිටියේය.

දෙපාර්ශ්වයේ කරුණු  සැලකිල්ලට ගත් අතිරේක මහේස්ත්‍රාත් සඳුනි හපුආරච්චි මෙනවිය සැකකරුවන් ඕනෑම ඇප කොන්දේසියක් මත මුදා හරින ලෙසට ඔවුන් වෙනුවෙන් පෙනී සිටි නීතිඥයන් කළ ඉල්ලීම් තරයේ ප්‍රතික්ෂේප කරමින් සියලු සැකකරුවන් මේ මස 24 වන දින දක්වා රිමාන්ඞ් භාරයට පත් කිරීමට නියොග කළාය.

සත්ව අයිතීන් සුරැකීමේ ජාතික ව්‍යාපාරය වෙනුවෙන් නීතිඥ සුසිල් සිරිවර්ධන මහතා පෙනී සිටි අතර අගතියට පත් වන අලියාගේ අයිතිවාසිකම් වෙනුවෙන් අනුරාධපුර නීතීඥ සංගමය නියෝජනය කරමින් නීතිඥවරුන් වන චතුර ධනංජය රණතුංග , භාග්‍ය ශ්‍රී හේරත් සහ ප්‍රදීප් දිසානායක යන මහත්වරු පෙනී සිටියහ.