(අංජුල මහික වීරරත්න)

ශ්‍රී ලංකා අලෙවි කරණ ආයතනය (සංස්ථාගත කිරීමේ) පනත සංශෝධනය කිරීමට කැබිනට් අනුමැතිය ලැබී ඇත.

1980 අංක 41 දරන ශ්‍රී ලංකා අලෙවිකරණ ආයතනය (සංස්ථාගත කිරීමේ) පනත මඟින් ශ්‍රී ලංකා අලෙවිකරණ ආයතනය ස්ථාපනය කර ඇති අතර, එය ශ්‍රී ලංකා වයඹ විශ්ව විද්‍යාලය, ශ්‍රී ලංකා සබරගමුව විශ්වවිද්‍යාලය සහ ශ්‍රී ලංකා රජරට විශ්ව විද්‍යාලය ඇතුළු මෙරට ප්‍රමුඛතම උසස් අධ්‍යාපන ආයතන / විශ්ව විද්‍යාල සමඟ ශක්තිමත් හවුල්කාරිත්වයක් පවත්වා ගෙන යමින් අලෙවි කරණ අධ්‍යාපනය ප්‍රවර්ධනය කිරීම සඳහා කටයුතු කරනු ලබයි. 

එම ආයතනය  මඟින් වාර්ෂිකව අලෙවිකරණ හා ව්‍යවසායකත්ව වෘත්තීය සුදුසුකම සහිත සිසුන් 8,000 කට ආසන්න සංඛ්‍යාවට අධ්‍යාපනය ලබා දෙන අතර, මෙරට ප්‍රමුඛ පෙළේ සමාගම් සිය සේවකයන්හට අලෙවිකරණ පුහුණුව ලබා දීම සඳහා එම ආයතනයේ සේවය ලබා ගනු ලබයි.

 එම ආයතනය මඟින් සපයනු ලබන සේවාවන් තවදුරටත් පුළුල් කිරීමට සහ වඩාත් කාර්යක්ෂමව ඉටු කිරීමට හැකි වන පරිදි 1980 අංක 41 දරන ශ්‍රී ලංකා අලෙවිකරණ ආයතනය (සංස්ථාගත කිරීමේ) පනතේ විධිවිධාන සංශෝධනය කළ යුතු බව හඳුනාගෙන ඇත. 

ඒ අනුව, එකී පනත සංශෝධනය කිරීම පිණිස කර්මාන්ත සහ ව්‍යවහායකත්ව සංවර්ධන අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.