රුපියල් අසූ තුන් ලක්ෂයක් වටිනා රට සල්ලි තොගයක් තම යට ඇඳුම් තුළ  සහ අත් බෑගයේ සඟවාගෙන ඉන්දියාවේ චෙන්නායි නුවර සිට මෙරටට පැමිණි ශ්‍රී ලාංකික මවක(57) සහ ඇගේ දියණියද(39),  අසල්වැසි කාන්තාවක්ද(64) කටුනායක ජාත්‍යන්තර ගුවන්තොටුපොළේදි අත් අඩංගුවට ගත් බව රේගු මාධ්‍ය ප්‍රකාශක රේගු නීති අංශයේ අධ්‍යක්ෂක ලෙස්ලි ගාමිණී මහතා පැවසුවේය.

සැකකාරියෝ කොළඹ ග්‍රෑන්ඩ්පාස්   ප්‍රදේශයේ පදිංචි නිතර නිතර ඉන්දියාවට යන එන අයවලුන් බව රේගුව කියයි.

අත් අඩංගුවට ගත් විදේශීය මුදල් අතර ඇමරිකානු ඩොලර් පනස් නව දහස් පන්සීයක්, සෞදි රියාල් එක්දහස් හාරසිය පහක් සහ යුරෝ එක්දාස් දෙසීයක්,  ස්ටාර්ලින් පවුම් තුන්සිය හතලිස් පහක්  තිබු බව රේගුව කියයි.

මෙම කාන්තාවන් තිදෙනා ශ්‍රී ලංකන් ගුවන්සේවයට අයත් යු.එල් 124 දරණ ගුවන් යානායෙන් ඉන්දියාවේ චෙන්නායි නුවර සිට මෙරටට පැමිණ රේගුවට කිසිවක් ප්‍රකාශ නොකර රේගු පරිශ්‍රය පසුකරමින් ගුවන්තොටුපොළෙන් පිටවීමට යද්දී අත්අඩංගුවට ගත් බව රේගුව කියයි.

මේ පිළිබඳ විමර්ශන කටයුතු ගුවන්තොටුපොල රේගු අධ්‍යක්ෂක දීපාල් සිරිබද්ධන මහතාගේ උපදෙස් මත රේගු අධිකාරී එස්. ඥානානන්ද, නියෝජ්‍ය රේගු අධිකාරී නිශාන්ත ජයසිංහ සහ සහකාර රේගු අධිකාරීවරුන් වන නුවන් අබේනායක, හසන්ත ගුරුගේ, බුද්ධිද සිල්වා සහ සේනානි පෙරේරා යන නිලධාරීහු සිදු කරති.