(ජයන්ත සමරකෝන්)

ආගමන විගමන නීති උල්ලංඝනය කරමින් වීසා කාලය ඉක්මවා මඩකලපුව කාත්තන්කුඩි ප්‍රදේශයේ රන් භාණ්ඩ නිපදවන වෙළඳසැල්වල සේවය කරමින් සිටි ඉන්දියානු ජාතිකයින් 11 දෙනෙකු ආගමන විගමන නිරීක්ෂණ හා බුද්ධි අංශ නිලධාරීන් කණ්ඩායමක් විසින් අද (04) අත්අඩංගුවට ගෙන ඇත.

සංචාරක වීසා මත මෙරටට පැමිණ ඇති මෙම කණ්ඩායම වයස අවුරුදු 23 ත් 45 ත් අතර වයස් වල පසුවන්නන් බව විමර්ශන වලදී හෙළිවී තිබේ.

ලැබුණු තොරතුරකට අනුව මෙම හදිසි වැටලීම සිදුකර ඇති අතර එම අවස්ථාවේදී ඉන්දියානු ජාතිකයින් 11 දෙනා වෙළඳසැලේ සේවයේ යෙදී සිට ඇතැයි එහි නිලධාරියෙකු පැවසීය.

වැඩිදුර පරීක්ෂණ  සඳහා මෙම 11 දෙනා මිරිහාන රැඳවුම් කඳවුරවෙත රැගෙන විත් තිබේ.

ආගමන විගමන පාලක ජනරාල් සරත් රූපසිරි මහතාගේ උපදෙස් මත නියෝජ්‍ය පාලක විපුල් කාරියවසම් මහතා ඇතුළු නිලධාරීන් කණ්ඩායමක් මෙම වැටලීම සිදුකර ඇත.