(හර්ෂණ තුෂාර සිල්වා)

ආර්ථික සහ සමාජ මට්ටම්වලින් ඉහළට යමින් තාක්ෂණයෙන් සහ විද්‍යාවෙන් දියුණුව අත්පත් කරගනිමින් ශ්‍රී ලංකාව යහපත් රටක් බවට පත් කිරීම සඳහා දේශපාලනඥයන්ගේ කාර්යයට වඩා විද්වතුන්ගේ කාර්ය වඩා වැදගත් යැයි තමන් විශ්වාස කරන බව ජනාධිපති මෛත්‍රීපාල සිරිසේන මහතා අද (2) ප්‍රකාශ කළේය.

ආචාර්ය මහාචාර්යවරුන්ගෙන් සහ බුද්ධිමත් තරුණ තරුණියන්ගෙන් සමන්විත මෙරට විශ්ව විද්‍යාල පද්ධතිය රටේ ප්‍රශ්න සම්බන්ධයෙන් දැනට වඩා විවෘත මනසකින් බැලිය යුතු බවත් විවෘතභාවයකින් යුතුව සමාජයට එක්විය යුතු බවත් ජනාධිපති මෛත්‍රීපාල සිරිසේන මහතා පැවැසීය. 

රටේ විද්වත් ප්‍රජාවගේ දැනුම හැකියාවන් යනාදිය එක්තරා සීමාවකට කොටු වී ඇතැයි ද ජනාධිපති මෛත්‍රීපාල සිරිසේන මහතා කීය. 

ශ්‍රී ජයවර්ධනපුර විශ්ව විද්‍යාලයට වසර 60ක් පිරීම නිමිත්තෙන් සංවිධානය කර තිබෙන ‘නවෝත්පාදන සහ නව නිපැයුම් - ඉනවේට් 2019’ ප්‍රදර්ශනය විවෘත කිරීමේ අවස්ථාවට එක්වෙමින් ජනාධිපති මෛත්‍රීපාල සිරිසේන මහතා එම කරුණු සඳහන් කළේය. 

කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ, සිරිමාවේ බණ්ඩාරනායක ශාලා පරිශ්‍රයේ දී මෙම ප්‍රදර්ශනය පැවැත්වේ. 

එහිදි තවදුරටත් උත්සව සභාව ඇමතූ ජනාධිපති මෛත්‍රීපාල සිරිසේන මහතා මෙසේ ද කීය.

“නිදහස් අධ්‍යාපනයත් සමඟ විශ්ව විද්‍යාලවලින් බිහිවන උගතුන් බුද්ධිමතුන්, විශිෂ්ඨයන් පෙන්වන දක්ෂතා, ලෝකයේ දියුණුව වෙනුවෙන් කරන කටයුතු ලෝකයේ අනෙක් රටවලට දෙවැනි වන්නේ නැහැ. අපේ විශිෂ්ටයන් ලෝකයට දෙවැනි වී නැහැ. එය ඉතිහාසයෙන් ලද උරුමයක් බව කිව යුතුයි. අද අපි තාක්ෂණය ගැන කතා කරනවා. එදා අනුරාධපුර පොළොන්නරු යුගයේ තිබූ තාක්ෂණය පරාජය කරන්න හැකි වෙලා නැහැ. ඉතිහාසයේ අපේ විශිෂ්ඨත්වය සිහිපත් කළ යුතුයි. 

අදට සහ හෙටට අවශ්‍ය දේ අපි කවුරුත් තේරුම් අරගෙන තිබෙනවා. අපේ ආර්ථිකය සහ සමාජ පරිසර තත්ත්ව ගැන සතුටු විය හැකි කරුණු මෙන්ම සතුටු විය නොහැකි කරුණුත් තිබෙන බව අපි තේරුම් ගන්න ඕනේ. විශ්ව විද්‍යාලවල සිටින ආචාර්ය මහාචාර්යවරු, සිසු සිසුවියන් රටේ ප්‍රශ්න ගැන විවෘත සහ පුළුල් මනසකින් බලන්න ඕනේ. ඒ බව මම නිරන්තරයෙන් කියනවා. රටේ විශ්ව විද්‍යාල පද්ධතිය සමාජයට දැනට වඩා වැඩි දායකත්වයක් ලබා දෙන්න ඕනේ. සමාජය හා එක්වෙන්න ඕනේ. ඔබේ හැකියාවන්, දක්ෂතා, පරිණතාභාවය, විද්වතුන්ගේ, ආචාර්ය මහාචාර්යවරුන්ගේ බහුශ්‍රැතභාවය එක්තරා සීමාවකට කොටුවෙලා. 

මේ රට යහපත් කිරීමට, ආර්ථික සහ සමාජ මට්ටම්වලින් ඉහළට යෑමට, තාක්ෂණයෙන් සහ විද්‍යාවෙන් දියුණුව අත්පත් කරගැනීමට දේශපාලනඥයන්ගේ කාර්යභාරයට වඩා විද්වතුන්ගේ කාර්ය වඩා වැදගත් බව මම විශ්වාස කරනවා.  නවෝත්පාදන ආර්ථිකයක් ගැන කතා කරන යුගයක මෙම ප්‍රදර්ශනය කාලීන පියවරක් බව සිහිපත් කළ යුතුයි. අපි නීල ආර්ථිකය හරිත ආර්ථිකය ගැනත් කතා කරනවා.

තාක්ෂණයෙන් ඉහළ යන යුගයක, භෞතික සංවර්ධනය සොයා යන සමාජයක, වේගයෙන් සංවර්ධනය වෙන අධි තාක්ෂණික කාලයක දී මිනිස්සු මිනිස්සු විදියට මිනිස්සුන්ට ආදරය කරන රටට ආදරය කරන්න මිනිස්සු අවශ්‍ය වෙනවා. මිනිස්සු තාක්ෂණයට යට නොවිය යුතුයි. හැම වෙලාවෙම තාක්ෂණයට උඩින් මනුස්සකම තියෙන්න ඕනේ. තමන්ගේ අධ්‍යාපන සහ විභාගවලට අදාළ නොවුණත් සියලු දෙනා සාහිත්‍ය, කලාව සහ ඉතිහාසය යන විෂය ඉගෙන ගන්න ඕනේ. එසේ නොකරන සියලු දෙනාගේ මනුස්සකම අඩු වෙනවා. ඔවුන් තුළ තිබෙන ආදරය නැති වෙලා යනවා. රටට ආදරේ වෙන්නේ නැහැ, මිනිස්සුන්ට ආදරේ වෙන්නේ නැහැ.

රටක් දියුණු කරන්න තාක්ෂණය අවශ්‍යයි. තාක්ෂණික ලෝකය ජයගන්න ඕනේ. තාක්ෂණය සමඟ බද්ධ වෙන්න ඕනේ. එසේ වුවත් රටක් සංවර්ධනය කරන්න නම් තාක්ෂණය පමණක් ප්‍රමාණවත් වෙන්නේ නැහැ. තාක්ෂණයත් සමඟ ඉදිරියට යන ඉතිහාස්‍ය. සාහිත්‍ය, කලාව වගේම මනුස්සකම දන්න දැනුවත් මිනිස්සු ඕනේ. ශ්‍රේෂ්ඨ සහ ආඩම්බර ජාතියක් ගොඩගන්න එහෙම මිනිස්සු ඕනේ.

මේ සියල්ල අවසානයේදී අපි අපට තියෙන අභියෝග හඳුනාගන්න ඕනේ. මත්ද්‍රව්‍ය, සියදිවි නසා ගැනීම් වැනි රට මුහුණ දෙන ප්‍රශ්න විසඳා ගැනීම සඳහා රටේ උද්ගතුන් මීට වඩා ඔවුන්ගේ දැනුම, කාලය, සහභාගීත්වය ලබා දිය යුතුයි. 

එහිදි අදහස් දැක්වූ ශ්‍රී ජයවර්ධනපුර විශ්ව විද්‍යාලයේ උප කුලපති ජ්‍යෙෂ්ඨ මහාචාර්ය සම්පත් අමරතුංග මහතා මෙසේ කීය.

“නවෝත්පාදනය, නව නිපැයුම් නැතුව රටකට පැවැත්මක් නැහැ. නවෝත්පාදනය, නව නිපැයුම් නැතිව රටකට ඉදිරියට යන්න බැහැ. නවෝත්පාදනය, නව නිපැයුම් පැමිණිය යුත්තේ සමාජයෙන්. අපේ මේ ප්‍රදර්ශනයෙන් නවෝත්පාදනය, නව නිපැයුම් ඔස්සේ රටේ ප්‍රශ්න රැසකට පිළිතුරු හා විසඳුම් සොයාගෙන තිබෙනවා. විසඳුම් ලබාදී තිබෙනවා. මේ ප්‍රදර්ශනයෙන් අපේ රටට බොහෝ සෙයින් අදාළයි. 

අපි වස විස නැති රටක් ගැන කතා කරනවා. පළතුරුවල විස, රසායනික ද්‍රව්‍ය අඩංගු දැයි සොයාගන්න පුළුවන් ජංගම දුරකතන මෘදුකාංගයක් හඳුන්වා දී තිබෙනවා. කර්මාන්තශාලාවලින් ගංඟාවලට වර්ණකාරක, රසායනික ද්‍රව්‍ය එකතු වෙනවා. එය විශාව වශයෙන් සිදුවෙනවා. එයින් ජලය අපවිත්‍ර වෙනවා. අපේ සිසුන් එම ජලය පිරිසුදු කළ හැකි බැක්ටීරියාවක් සොයාගෙන තිබෙනවා. මේ ආකාරයෙන් රටේ ප්‍රශ්නවලට විසඳුම් දෙන නවෝත්පාදන සහ නව නිපැයුම් රැසක් හොයාගෙන තිබෙනවා. මේ ප්‍රදර්ශනයේදී ඒ සියල්ල බලාගන්න පුළුවන්. නව නර්මාණ 200කට ආසන්න සංඛ්‍යාවක් මේ ප්‍රදර්ශනයට එක් කර තිබෙනවා”.