(නිමල කොඩිතුවක්කු)   
 
හදිසි අවශ්‍යතාවයක් ලෙස සලකා පාසල් සහ ආගමික ස්ථානවල ආරක්ෂාව වෙනුවෙන් විශ‍්‍රාමික හමුදා නිලධාරීන්  නැවත සේවයට කැඳවන ලෙස ජනාධිපති මෛත‍්‍රීපාල සිරිසේන මහතාගෙන් ඉල්ලීමක් කරන බව ජාතික ප‍්‍රතිපත්ති සහ ආර්ථික කටයුතු රාජ්‍ය අමාත්‍ය නිරෝෂන් පෙරේරා මහතා පැවැසීය.
 
රට තුළ උද්ගතව ඇති හදිසි තත්ත්වය පිළිබඳව සලකා බලා ආරක්ෂක ක‍්‍රමවේද තවදුරටත් ශක්තිමත් කරන්නැයි තමන් ජනාධිපතිවරයාගෙන් ඉල්ලා සිටින බවත් රාජ්‍ය අමාත්‍යවරයා සඳහන් කළේය.
 
රටේ වත්මන් තත්ත්වය සම්බන්ධයෙන් කොළඹදී මාධ්‍ය හමුවේ අදහස් පළ කරමින් ඔහු මේ බව පැවැසීය.
 
එහිදී වැඩිදුරටත් අදහස් දැක්වූ ජාතික ප‍්‍රතිපත්ති සහ ආර්ථික කටයුතු රාජ්‍ය අමාත්‍ය නිරෝෂන් පෙරේරා මහතා මෙසේ කීය.
 
“රට ත‍්‍රස්තවාදී තර්ජනයකට මුහුණ දී ඇති මේ අවස්ථාවේ විශ‍්‍රාමික හමුදා නිලධාරීන්ගේ සහය ද  ආරක්ෂක කටයුතු වෙනුවෙන් ලබා ගත යුතුයි. යුදසමයේ දී හදිසි අවස්ථාවන්ට මුහුණදීමේ පුහුණුව ලත් නිලධාරීන්ගේ එම සේවය මෙම අවස්ථාවේ ලබා ගත හැකිනම් රටේ ආරක්ෂාව වෙනුවෙන් එය ඉතා වැදගත්වනවා.
 
මහජනතාවගේ ආරක්ෂාව තහවුරු කිරීම සඳහා ආරක්ෂණ උපකරණ අවශ්‍ය වන්නේ නම් විශේෂ කැබිනට් මණ්ඩල අනුමැතියක් මගින් හදිසි අවශ්‍යතාවක් ලෙස සලකා අදාළ උපකරණ මිලදී ගැනීම සිදු කළ යුතුයි.
 
පාස්කු ඉරිදා දින ම්ලේච්ඡ ප‍්‍රහාර එල්ල කළ අන්තවාදී ත‍්‍රස්ත සංවිධාන ස්ථිර තහනමකට ලක් කිරීම කෙරෙහිද රජයේ අවධානය යොමුවිය යුතුයි. දැනට හදිසි නීති රෙගුලාසි යටතේ එම සංවිධාන තහනම් කර තිබුණත්  නව නීති සකස් කර හෝ නෛතික වශයෙන් අන්තවාදී සංවිධාන විනාශ කර දැමීමට පියවර ගතයුතුයි.

නිතිය සහ සාමය පිලිබඳ අමාත්‍යාංශයේ වගකීම ෆීල්ඞ් මාර්ෂල් සරත් ෆොන්සේකා මහතාට ලබා දියයුතු බවට එක්සත් ජාතික පක්ෂ  පාර්ලිමේන්තු කණ්ඩායම ඒකමතිකව ජනාධිපතිවරයාගෙන් ඉල්ලා තිබෙනවා. මේ වෙලාවේ  පෞද්ගලිකත්වයට වඩා රට වෙනුවෙන් තීරණ ගැනීමට යොමු වීම අත්‍යවශ්‍ය කරුණක්.

දේශපාලඥනයන් ලෙස අපි කවුරුත් රට ගැන සිතා කටයුතු කළ යුතුයි” යැයිද රාජය අමාත්‍යවරයා එහිදී සඳහන් කළේය.