(විනීතා එම් ගමගේ)

නව ඇමැති මණ්ඩලය පත් කිරීමේ දී ජනාධිපතිතුමන් හා අගමැතිතුමන් මුහුණ දී සිටින දුෂ්කරතාව ගැඹුරින් කල්පනා කර කිසිම ඇමැති ධුරයක් බාර නොගැනීමට තීරණය කළ බව දන්වා පිවිතුරු හෙළ උරුමය නායක, පාර්ලිමේන්තු මන්ත‍්‍රී උදය ගම්මන්පිල මහතා ජනාධිපති ගෝඨාභය රාජපක්ෂ මහතා වෙත ලිපියක් යවා ඇත.

රාජපක්ෂ මහතාට සහය දුන් පාර්ලිමේන්තු කණ්ඩායමේ සිටින දින සීයේ අන්තර්කාලීන ආණ්ඩුවේ ඇමැති ධූර අපේක්ෂා කරන හිටපු කැබිනට් ඇමැතිවරු ගණන 38 ක් වූ බවත් කැබිනට් ඇමැති ධූර අපේක්ෂාවෙන් දිස්ත‍්‍රික් නායකයින් ගණනාවක් ද සිටි බවත් ගම්මන්පිල මහතා තම ලිපිය මගින් පෙන්වා දෙයි.

මෙවැනි තත්ත්වයක් යටතේ 10 දෙනෙකුට සීමා වූ ඇමැති මණ්ඩලයක් යෝජනා අන්තර්කාලින ආණ්ඩුව සඳහා යෝජනා වූ අතර, පසුව 15 දෙනෙක් දක්වා ඉහළ නැංවූ නමුත් එය සැකසීම අතිශයින්ම දුෂ්කර බැව් තමන් දන්නේ යැයි ද මන්ත‍්‍රීවරයා යැවූ ලිපියේ සඳහන් වේ.

මෙවැනි තත්ත්වයක් යටතේ ඇමැති මණ්ඩලය සැකසීමේ දී ජනාධිපතිවරයා හා අගමැතිවරයා මුහුණ දී සිටින දුෂ්කරතාව යම් තරමකට හෝ අවම කර දීම සඳහා මෙම පියවර ගත් බව ද එම  ලිපියේ සඳහන්වේ.

ආණ්ඩුක‍්‍රම ව්‍යවස්ථාව අනුව පාර්ලිමේන්තුවේ තුනෙන් දෙකක බහුතරයකින් සම්මත වන යෝජනාවකින් පාර්ලිමේන්තුව විසුරුවා හරින මෙන් ජනාධිපතිවරයාගෙන් ඉල්ලා නොසිටියහොත් ජනාධිපතිවරයාට පාර්ලිමේන්තුව විසුරුවාලිය හැක්කේ 2020 මාර්තු 1 වැනිදා බවත් ඒ අනුව අද පත්වූ ආණ්ඩුව පවතින්නේ දින සියයක් බවත් එම ලිපියේ වැඩි දුරටත් සඳහන් වේ.