(චන්ද්‍රසිරි ගුණසේකර)

ඇල්පිටිය මහජන ක්‍රිඩාංගණය අසල ළිඳක තිබී  අද (08) සවස මළසිරුරක් හමුවූ බව ඇල්පිටිය පොලිසිය පවසයි.

මෙසේ මියගොස් සිටින අය පිටිගල පොලිස් වසමට අයත් පිටිගල,වැයිහේන,ගාලියද්ද ලිපිනයේ පදිංචි පිටිගල කංකානම්ගේ චතුරංග මහෂ් (23) නැමැති අයගේ බවට ඔහුගේ ඥාතීන් විසින් හඳුනාගෙන තිබේ.

ඉකුත්(06) ඉරිදා රාත්‍රී ඇල්පිටිය  මහජන ක්‍රීඩාංගණයේ සංගීත සංදර්ශණයක් තිබී ඇති අතර මෙම තරුණයා එදින රාත්‍රී එම සංගීත සංදර්ශනය නැරඹීම සඳහා නිවසින් පිටත්ව පැමිණි බවටත් මෙතෙක් ඔහු ආපසු නිවෙසට නොපැමිණි බවටත් ඔහුගේ මව පිටිගල පොලිසියට පැමිණිල්ලක් කර තිබූ බවද පොලිසිය පවසයි.

මෙම පැමිණිල්ල සම්බන්ධයෙන් විමර්ශනය කරමින් සිටියදී ඇල්පිටිය මහජන ක්‍රීඩාංගණය අසල පදිංචිකරුවකු සිය ඉඩමේ පිහිටි පානීය ජලය ලබාගන්නා ළිඳේ මළසිරුරක් තිබෙන බවට පොලිසියට දැනුම් දී ඇත.ඒ අනුව විමර්ශන සිදුකළ පොලිසිය විසින් මෙම මළසිරුර සොයාගෙන ඇත.

ඇල්පිටිය මහජන ක්‍රීඩාංගණයේ පැවති සංගීත සංදර්ශනය නැරඹීමට  පැමිණ සිටි කිසියම් දෙපිරිසක් අතර ආරවුලක් ඇතිවූ බවටද පොලිසියට තොරතුරු ලැබී ඇතැයි කියති.